Следчы камітэт узбуджае крымінальныя справы праз пагрозы дэпутатам і членам выбарчых камісій

Следчы камітэт (СК) Беларусі расследуе крымінальныя справы па фактах пагроз у дачыненні да службовых асоб, дэпутатаў, суддзяў, членаў выбарчых камісій, настаўнікаў для перашкоды іх законнай дзейнасці і прымусу да яе змены, паведамляе ведамства.

Паводле інфармацыі СК, службовыя асобы атрымліваюць паведамленні, дзе апісваюцца крывавыя сюжэты расправы над блізкімі ў сувязі з выкананнем службовых абавязкаў.

Зараз зарэгістравана больш за 150 падобных выпадкаў па ўсёй краіне, па іх больш за дзесяць крымінальных спраў распачата за апошнія два дні, парадку пяцідзесяці - з пачатку жніўня.

У сувязі з заклікамі аб адклiканнi дэпутатаў, якія з’явіліся ў інтэрнэце, некаторым з іх пачалі паступаць пагрозы расправай, калі яны не складуць свае паўнамоцтвы. Ахвярамі ўжо сталі шэраг дэпутатаў Палаты прадстаўнікоў Нацыянальнага сходу і кіраўнікоў мясцовых органаў улады з Мінска, Гомеля і іншых гарадоў, паведамляе ведамства.

Як прыклад рэалізацыі пагроз СК прыводзіць выпадак у Мінску 28 жніўня, калі невядомыя разбілі машыну дэпутаткі Палаты прадстаўнікоў. У гэты дзень у Мінску разбілі Geely Atlas «Міс Беларусь» і дэпутаткі Марыі Васілевіч. Раней «Міс Беларусь» выказвалася з нагоды пратэстаў у краіне. Свой зварот яна размясціла ў Instagram, дзе папрасіла спыніць гвалт і агрэсію, спыніць жорсткасць у адносінах да тых, хто не можа сябе абараніць. Таксама яна наведвала ў бальніцы збітых падчас акцый пратэстаў і прабачылася перад людзьмі.

Паводле інфармацыі СК, напярэдадні інцыдэнту ў адрас Дэпутаткі паступалі пагрозы і абразы ў Viber і Telegram.

Ёсць і іншыя выпадкі пашкоджання маёмасці, транспарту дэпутатаў і членаў выбарчых камісій, супрацоўнікаў праваахоўных структур. «Па кожным з такіх выпадкаў праводзяцца неадкладныя следчыя дзеянні, накіраваныя на ўсталяванне асоб падазроных», — паведамляе СК.

Таксама СК звярнуў увагу на Telegram-чаты беларускіх гарадоў з назвамі «…для жыцця». «У іх нярэдка размяшчаюцца ілжывыя звесткі, абразы, фатаграфіі і іншыя асабістыя звесткі кіраўнікоў мясцовых органаў улады, супрацоўнікаў органаў унутраных спраў, суддзяў, членаў выбарчых камісій і іншых асоб. Аналіз публікаванай інфармацыі ў дадзеных групах дазваляе праваахоўнікам судзіць аб відавочна выяўленым негатыве ў дачыненні да тых, хто не падзяляе іх погляды. Па кожным з такіх выпадкаў будзе дадзена прававая ацэнка дзеянням датычных асобаў», — сказана на сайце ведамства.

Дэпутатаў сапраўды спрабуюць адклікаць

На 20 выбарчых акругах Мінска частка выбаршчыкаў ініцыявала адкліканне дэпутатаў Палаты прадстаўнікоў. Пра тое, што ў грамадзян ёсць такое права, напярэдадні нагадалі адзін з членаў прэзідыума Каардынацыйнага савета і ініцыятыва «Сумленныя людзі». Выклікаць дэпутатаў на справаздачныя сустрэчы і ініцыяваць іх адкліканне прапаноўвалі і ў Гродне.

Да гэтага Беларускі Хельсінкскі Камітэт запатрабаваў ад дэпутатаў Нацыянальнага сходу Беларусі стварыць парламенцкую камісію па расследаванні катаванняў. Праваабаронцы заклікалі беларусаў пісьмова (праз пошту, афіцыйны e-mail) звярнуцца да сваіх дэпутатаў з патрабаваннем ініцыяваць стварэнне такой камісіі.

Пагрозы працоўным

Між тым пагрозы паступаюць не толькі дэпутатам. Юлія Сліўко, старшыня страйкаму «Гродна Азот», атрымлівала тэлефанаванні з пагрозамі наконт сына са схаваных нумароў і нібыта ад органаў сацыяльнай апекі.

Чытайце таксама: Задержание и угрозы изъять детей. Как в Гродно давят на руководителей забастовок

Аднаму з работнікаў «Гродна Азот» пасля сустрэчы з Уладзімірам Каранікам на прадпрыемстве прыйшло паведамленне ў Telegram з пагрозай, як толькі ён выйшаў з будынка.

Заявы пра гвалт з боку сілавікоў аб’ядноўваюць у адно справаводства

Заявы ад пацярпелых ад сілавікоў грамадзян аб’ядноўваюцца ў адно справаводства, часам цэлымі вуліцамі, на якіх працавалі адны і тыя ж людзі, збіраюцца факты для расследаванняў, каб затым даць прававую ацэнку дзеянням усіх бакоў. Пра гэта расказаў Уладзімір Каранік, новы кіраўнік Гродзенскай вобласці, на сустрэчы з ініцыятыўнай групай Гродзенскага дзяржаўнага универсітэта ім. Я.Купалы.