На аўкцыён выставілі тры дамы ў гродзенскім Новым свеце. Што там можа з’явіцца?

Тры нежылыя дамы па вул. Міцкевіча, 1, 7 і 9 у Гродне выставілі на аўкцыён. Таргі пройдуць 6 жніўня, паведамляе Гродзенскі цэнтр нерухомасці. Будынкі можна рэканструяваць пад аб’екты грамадскага прызначэння. Гэта значыць, там могуць з’явіцца гандлёвыя, адміністрацыйныя, офісныя цэнтры, установы грамадскага харчавання або бытавога абслугоўвання.

Дом па вул. Міцкевіча, 1

Нежылы будынак са склепам і мезанінам, інжынернымі сеткамі і правам заключэння дагавора арэнды ўчастка на 50 гадоў - 61 880 руб. 49 кап.

Дом па вул. Міцкевіча, 7

Нежылы будынак і права заключэння дагавора арэнды ўчастка на 50 гадоў - 52 918 руб. 03 кап.

Дом па вул. Міцкевіча, 9

Нежылы будынак і права заключэння дагавора арэнды ўчастка на 50 гадоў - 78 800 руб. 52 кап.

Чытайце таксама: Нашелся наследник владельца дома на Мицкевича: «Думаете, я бы довел его до такого состояния?»

Калі аўкцыён?

Аўкцыён адбудзецца 6 жніўня 2020 года 15.00 па адрасе: г. Гродна, вул. 17 Верасня, 39. Апошні дзень падачы заяў на ўдзел у аўкцыёне — 31 ліпеня 2020 г. да 17.00.

Што можна і чаго нельга там рабіць?

Пакупнік за год павінен распрацаваць праектную дакументацыю на правядзенне рэканструкцыі або капітальнага рамонту будынкаў. Правесці рэканструкцыю або капітальны рамонт і ўвесці будынак у эксплуатацыю трэба за тры гады. Забаронена знішчэнне, прычыненне шкоды і пагаршэнне тэхнічнага стану будынкаў. Пад забаронай таксама навукова неабгрунтаванае змяненне архітэктуры фасадаў, знішчэнне архітэктурных і канструктыўных асаблівасцяў будынкаў, пагаршэнне ўмоў успрымання шэраговай гістарычнай забудовы.

Чаму будынкі важна захаваць?

Будынкі знаходзяцца ў Новым свеце. Гэта гістарычны раён горада Гродна, размешчаны ў паўночнай частцы гістарычнага цэнтра, у межах вуліц Міцкевіча, Астроўскага, Ватуціна, Рэйманта і часткі вуліц 17 Верасня і Горкага. Гісторыкі кажуць, што тут захаваўся пейзаж пачатку мінулага стагоддзя і прапаноўваюць арганізаваць музей пад адкрытым небам. Тым не менш, гістарычныя будынкі перыядычна зносяць, а тыя, што засталіся, часта перабудоўваюць уладальнікі, змяняюць у іх дзверы і вокны, з-за чаго дамы страчваюць аўтэнтычны выгляд.

Чытайце таксама:

• Закон о зоне: поможет ли новый документ спасти Гродно от разрушения
• Как по-новому открывается Новый свет, если закрыть глаза

Раней дамы хацелі знесці

У траўні 2019 года павінен быў прайсці аўкцыён па продажы участкаў з дамамі на Міцкевіча, але тады патэнцыйны інвестар меў права проста знесці іх і пабудаваць на іх месцы 2−3-павярховы навабуд.

Пасля серыі публікацый Hrodna.life і актыўнай працы гісторыка Мечыслава Супрона ў ліпені 2019 гарадскія ўлады адмовіліся ад продажу дамоў адным лотам пад знос. Аўкцыён з умовай захавання забудовы павінен быў прайсці 11 чэрвеня 2020, але на яго не паступіла заявак.

Чытайце таксама:

• Новы цмок для дома з цмокамі. Што намалявала мастачка за тыдзень арт-марафону ў Новым Свеце
• «Отдайте дом и мы спасем его». Семья гродненцев хочет сохранить деревянные дома в Новом Свете