Гродзенскі дзіцячы хоспіс імя Святога Губерта адкрыў Цэнтр паліятыўнай дапамогі ў сярэдзіне ліпеня ў мікрараёне Паўднёвы. Настаяцель прыходу Серафіма Жыровіцкага ў Гродне айцец Іаан Велясейчык пабачыў у навінах, што хоспіс шукае месца для лячэння цяжкахворых дзяцей, і прапанаваў памяшканне пры царкве. Да таго там меркавалася адкрыць цэнтр для паломнікаў.

Новы Цэнтр паліатыўнай дапамогі для цяжкахворых дзяцей ужо працуе ў тэставым рэжыме на вуліцы імя Ігната Дамейкі. Царква прадаставіла памяшканне цалкам бясплатна. Цяпер гэта — першы падобны цэнтр дапамогі пры праваслаўным храме ў Гродзенскай вобласці, а магчыма, і ва ўсёй Беларусі, піша «Народная воля».

Месца для аказання неабходнай дапамогі дзецям, размяшчэння абсталявання не хапала, а гарадскія ўлады пакуль не змаглі прапанаваць патрэбнага памяшкання. Хоспіс месціцца ў будынку паліклінікі.

Спецыялісты хоспіса пабачылі, што хоць памяшканне пры царкве не зусім ідэальнае, але цалкам прыдатнае, каб размясціць тут неабходнае абсталяванне і працаваць. Больш таго, у раёне, дзе знаходзіцца царква, жыве вельмі шмат пацыентаў хоспіса — зараз іх каля сямідзесяці.

«Так што мы цяпер знаходзімся ў двух памяшканнях, — распавядае дырэктарка дзіцячага хоспіса Вольга Вялічка. — Але вельмі спадзяёмся на тое, што гарвыканкам выканае сваё абяцанне і прадставіць нам месца, дзе мы зможам размясціцца ў адным будынку».

Дырэктарка хоспіса Вольга Вялічка. Фота «Радыё Свабода»

У новым цэнтры будуць аказваць сацыяльныя паслугі невылечна хворым дзецям з хоспісу. Таксама паслугі будуць аказваць усім цяжка хворым дзецям за ахвяраванні, піша «Радыё Свабода».

Паслугі паліятыўнага цэнтру — клясычныя ЛФК і масаж; укладкі, якія дазваляюць правільна раскласці рукі і ногі дзіцяці, каб цягліцы расслабляліся; нетрадыцыйная форма ўсходняй мэдыцыны — Су-джок-тэрапія; паслугі псіхолага. Тут працуюць абілітолягі, псіхолаг, спэцыяліст па камунікацыі з бацькамі, Су-джок-тэрапэўт, шукаюць сацыяльнага работніка.

Раней дзякуючы дабрачыннай акцыі «Хвалі дабрыні» — у хоспісе малявалі карціны, якія потым прадалі - атрымалася набыць абсталяванне для дзяцей, агульным коштам каля 20 тысяч эўра.

Чытайце таксама: «Майстры ўбачылі, сказалі - класна!» Купі шопер, футболку або маску з «супрэматычным» прынтам і падтрымай дзіцячы хоспіс

«Вельмі шмат што цяжка хворым дзецям супрацьпаказана. Мы павінны знайсьці такія прыстасаванні, так са спэцыялістамі падысці, каб можна было не пакласці і чакаць, пакуль дзіця памрэ, а каб можна было зь ім працаваць. З любым дзіцем можна працаваць», — кажа дырэктарка госьпісу Вольга Вялічка.

Айцец Іаан Велясейчык на фоне комплекса царквы, дзе знаходзіцца Цэнтр паліатыўнай дапамогі. Фота «Народная воля»

У царкоўным комплексе побач месціцца нядзельная школа, актавая зала, дзе адбываюцца сходы прыхаджан, іншыя памяшканні для дзейнасці парафіі.

Здароўе не звязана з канфесійнасцю

У паліатыўным цэнтры пры царкве плануюць распачаць новую праграму «Маладыя дарослыя» для людзей з цяжкімі формамі інваліднасці, якім ужо ёсць 18 год. Гэтая праграма будзе сумесна развівацца з дарослай гарадской службай паліатыўнай дапамогі.

Акрамя гэтага плануецца аказваць новую паслугу: перадышка для бацькоў. І яшчэ адна праграма будзе датычыць жанчын-інвалідаў, а таксама жанчын, якія маюць дзяцей-інвалідаў і сутыкнуліся з хатнім гвалтам. Праграмы разлічаныя на бліжэйшыя пяць гадоў.

Спадарыня Вольга кажа, што дзіцячы хоспіс яшчэ не меў такога вопыту супрацоўніцтва з рэлігійнай канфесіяй і ёсць спадзяванне, што яно будзе плённым.

«Дарэчы тое, што мы знаходзімся пры праваслаўнай царкве зусім не азначае, што мы не будзем працаваць з людзьмі іншых канфесій, — завастрае ўвагу Вялічка. — Здароўе нашых пацыентаў - гэта галоўнае, і ніяк не звязана з іх канфесійнасцю».

Яна таксама зазначае, што хоспіс і надалей застаецца свецкай арганізацыяй і ў той самы час дадае, што ў планах супрацоўніцтва і з каталіцкім касцёлам, які знаходзіцца літаральна побач.

Хоспіс у Гродне — недзяржаўная, некамерцыйная арганізацыя. Яна існуе дзякуючы спонсарскай дапамозе перадусім буйных беларускіх прадпрыемстваў, ахвяраванням людзей і праектнай дзейнасці (гранты). Дзяржава не выдзяляе сродкаў на яе ўтрыманне.

Чытайце таксама:
За гродзенскіх валанцёраў у хоспісе, якія шылі камбінезоны для медыкаў, заступіўся Мечыслаў Гой

«Яны далі нуль грошай». Чаму гродзенскім дзіцячым хоспісам зацікавілася абласная камісія