Владимир Наумик с женой Виталией
Уладзімір Навумік з Гродна праходзіць абвінавачаным па так званай «справе Ціханоўскага» — Арганізацыя і падрыхтоўка дзеянняў, якія груба парушаюць грамадскі парадак (ч. 1 арт. 342 КК). Тыя ж дзеянні кваліфікавалі як дробнае хуліганства і непадпарадкаванне міліцыі і прысудзілі Уладзіміру 10 сутак адміністрацыйнага арышту. 16 ліпеня Навумік спрабаваў аспрэчыць гэтае рашэнне ў Гродзенскім абласным судзе. Рашэнне пакінулі без зменаў. Цяпер Уладзімір будзе абскарджваць рашэнне ў вышэйшай інстанцыі і шукае відэа відавочцаў, якія дапамаглі б даказаць яго невінаватасць.
Уладзімір прыйшоў на Савецкую плошчу 29 траўня, каб ацаніць Ціханаўскую і, магчыма, паставіць подпіс за яе. Калі пачалася бойка, па яго словах, ён падышоў да крамы «Ратушны». Пачаў здымаць аўтамабілі, якія былі прыпаркаваныя не па правілах. Да яго падбег чалавек у грамадзянскай форме і зацягнуў яго ў мікрааўтобус, распавядаў пра той дзень Уладзімір.
Уладзіміру прад’явілі абвінавачванні па ч. 1 арт. 342 КК (Арганізацыя і падрыхтоўка дзеянняў, якія груба парушаюць грамадскі парадак). 42 дні ён прабыў у зняволенне ў СІЗА № 1 Мінска. У гэты час яго жонка Віталія атрымала пагрозы забраць дзіця пасля інтэрв'ю Hrodna.life. 9 ліпеня Уладзіміра Навуміка і Васіля Баброўскага выпусцілі з мінскага СІЗА № 1. Ім змянілі меру стрымання з заключэння пад варту на падпіску аб нявыездзе.
Пакуль ён быў у СІЗА, 29 чэрвеня адбыўся суд па адміністратыўнай справе. Судзілі Навуміка паводле артыкулаў 17.1 КоАП (Дробнае хуліганства) і 23.4 КоАП (непадпарадкаванне законнаму распараджэнню ці патрабаванню службовай асобы пры выкананні). «Грамадзянін лаяўся матам і здымаў відэа на тэлефон. Крычаў словы: «мразі», «пачвары» і «фашысты», — паведаміў у судзе адзін з супрацоўнікаў АМАП, які выступаў сведкам. «…грамадзянін знаходзіўся ўвесь час пад нагамі, перашкаджаў працы міліцыі. Пры гэтым грамадзянін бегаў па праезжай частцы і лаяўся нецэнзурнай лаянкай у адрас супрацоўнікаў міліцыі», — дадаў другі сведка. 30 чэрвеня Навуміку прысудзілі 10 сутак арышту па двух артыкулах.
16 ліпеня Уладзімір абскардзіў рашэнне ў Гродзенскім абласным судзе. Ён казаў у судзе пра супярэчнасці ў паказаннях супрацоўнікаў АМАП, якія выступалі сведкамі. А таксама, што АМАП — зацікаўленая асоба ў гэтай справе.
«Казалі, што я ўвесь час здымаў на тэлефон, знаходзіўся не каля „Ратушнага“, а ў натоўпе. У натоўпе я сапраўды знаходзіўся, але нічога не здымаў, проста назіраў. Казалі, што я без маскі знаходзіўся. Але на відэа бачна, што я ўсюды ў масцы чорнага колеру. Суддзя заявіла, што гэта не даказвае і не абвяргае маю віну», — распавёў ён Hrodna.life.
Таксама суд не ўлічыў, што ва Уладзіміра на ўтрыманні знаходзіцца дзіця, што з’яўляецца змякчальнай акалічнасцю. Да таго ж, за тыя ж дзеянні яго могуць пакараць паводле ч. 1 арт. 342 КК, гэта значыць пакараць двойчы, а гэта супярэчыць беларускаму заканадаўству.
Рашэнне пакінулі без зменаў, скаргу — без задавальнення. Уладзімір будзе абскарджваць рашэнне суда ў вышэйшай інстанцыі.
Жалобу гродненца, которого отпустили из минского СИЗО, в суде не удовлетворили
Уладзімір таксама хадайнічаў, што відэа з камеры будынка па вул. Савецкая, 2 прыцягнулі да матэрыялаў справы, але хадайніцтва не задаволілі.
«У мяне адзіная абарона — гэта відэа», — сказаў Уладзімір Hrodna.life. Ён таксама падазраецца па арт. 364 — Гвалт альбо пагроза ўжывання гвалту ў дачыненні да супрацоўніка органаў унутраных спраў.
Гродзенец просіць дапамагчы знайсці відэа, на якіх відаць, што ён не лаяўся матам і не ўдзельнічаў у бойцы. А таксама — што яго «схапілі і павалаклі», а не прадставіліся і прапанавалі прайсці ў аўтамабіль, як распавядалі супрацоўнікі АМАП. Можаце дасылаць на пошту info@hrodna.life або ў Instagram. Hronda.life перадасць відэа Навуміку і гарантуе вашу ананімнасць.
Уладзімір пасля вызвалення вярнуўся да працы. Ён працуе інжынерам-канструктарам на Гродзенскім заводзе гандлёвага машынабудавання. На працы з разуменнем паставіліся да сітуацыі. Там арганізавалі фінансавую дапамогу жонцы, пакуль Уладзімір быў у СІЗА.
— Калі выйшаў, не чакаў, што людзі так падтрымаюць. Жонку наогул тут падтрымлівалі. А я не ведаў гэтага ўсяго. < … > Кажуць «мужык, малайчына». Усе ўсё разумеюць, усе ўсё бачылі, — сказаў Уладзімір Hrodna.life.
Адзінае, што азмрочвае сітуацыю — невядомасць. Ці будуць выклікі ў СІЗА № 1 Мінска, ці не пасадзяць яго зноў там? Ці не пасадзяць тут на 10 сутак або іх ўжо «залічылі»?
Уладзімір адправіць лісты і паштоўкі палітвязням. Гэта вельмі падтрымлівае, сказаў ён.
— Сядзіш — сядзіш, нічога няма, а тут раз — прыходзіць паштоўка, раз — ліст. Гэта крута. Сам хачу напісаць, — распавёў Уладзімір Hrodna.life.
Ад сваякоў Навуміку прыйшлі некалькі лістоў - больш не прапусцілі. Цяпер кожны дзень яны вяртаюцца. А вось ад старонніх лісты і паштоўкі прапускалі. «Хай пішуць людзі - гэта вельмі падтрымлівае маральна», — кажа ён.
У Гродне затрымалі палітычных актывістаў. Увечары 29 траўня на пікеце падчас збору подпісаў за Святлану Ціханоўскую адбыўся інцыдэнт, у выніку якога блогера Сяргея Ціханоўскага і некаторых яго прыхільнікаў затрымала міліцыя. Сярод затрыманых — сябра ініцыятыўнай групы Дзмітрый Фурманаў. Удзельніцу верагоднай правакацыі супраць Ціханоўскага апазналі ў сацсетках.
Затрыманні працягнуліся на наступны дзень. 30 траўня затрымалі актывіста Мікалая Саляніка, які днём раней вёў перамовы з кіраўніцтвам міліцыі і спрабаваў даведацца, за што быў затрыманы і дзе знаходзіцца Ціханоўскі. Праваабарончы цэнтр «Вясна» склаў спіс затрыманых у Гродне. Частку з іх перавезлі ў Мінск.
Гэта не спыніла ініцыятыўную групу Ціханоўскай. Афіцыйна было заяўлена, што падчас інцыдэнту пацярпеў міліцыянт. Узбуджаная крымінальная справа па факце гвалту ў адносінах да супрацоўнікаў органаў унутраных справаў. Нягледзячы на гэта, на наступныя дні да пікету Святланы Ціханоўскай выстраіліся чэргі — людзі стаялі, каб аддаць подпіс, нават пад дажджом.
Праваабаронцы прызналі Сяргея Ціханоўскага і іншых затрыманых у Гродне палітычнымі вязьнямі.
У выніку пад удар патрапілі і выпадковыя людзі. Увечары 29 траўня ў сацсетках пачалося цкаванне выпадковага чалавека, якога прынялі за супрацоўніка органаў у цывільным, які ўдзельнічаў у затрыманні ў Гродне. У дзяржаўных СМІ з другога боку пачалося цкаванне 81-гадовай пенсіянеркі Галіны Філіпаўны, якая падчас стрыму з Савецкай плошчы выказалася супраць Лукашэнкі і ў падтрымку Ціханоўскіх. Пенсіянерку Станіславу Дамшэль, якая 29 траўня таксама была на Савецкай, абвінавацілі ў дробным хуліганстве, але яна не пусціла міліцыю да сябе дадому. Выпадковыя людзі былі і сярод затрыманых на плошчы.
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…