Аляксандр Лукашэнка перакананы, што любы чалавек мае права выказваць сваю пазіцыю, але не агрэсіўна. Прэзідэнт адрэагаваў на мемы аб «Сашы 3%» і патлумачыў, што ён сам нікога не абражаў. Hrodna.life успомніў, што Аляксандр Лукашэнка казаў пра канкурэнтаў на выбарах.
— Я лічу, што любы чалавек, а меншасць — гэта ўжо некалькі чалавек, мае права выказваць сваю пазіцыю. Але з чым я ніколі не пагаджуся — калі гэта меншасць ці большасць вядзе сябе агрэсіўна. Гэта не са мной. Я часта кажу, што я чалавек вясковы, і хоць мы біліся і часам да мардабою даходзіла, мы ніколі не былі антаганістамі, ніколі не білі адзін аднаго да паўсмерці, — распавёў Лукашэнка на сустрэчы з супернікамі будаўніцтва акумулятарнага завода ў Брэсце, піша T*T.BY са спасылкай на «Беларусь 1».
Рэйтынг прэзідэнта і абразы
Лукашэнка заклікаў «супакоіцца» і ўсе праблемы вырашаць сумесна з уладай.
— Паслухайце, акрамя мяне, іх ніхто не вырашыць і ў той уладзе, якая сёння ёсць. Ніхто ўлады ў Беларусі сёння не памяняе. Не таму што мы яе будзем ссінелымі пальцамі ўтрымліваць, а таму што большасць пераважная, і мы ведаем, якая гэта большасць. Мы проста не друкуем гэтыя сацыялагічныя апытанні. Гэта вы ўжо «Саша 3%» напісалі на майках. Вы хоць верыце, што ў дзейнага прэзідэнта 3%? Ды вось у гэтай вось альтэрнатыўнай кампаніі я і то больш за тры набяру, — указаў на прысутных прэзідэнт. Ён параіў «не тузацца» і «не абражаць» ўладу.
— Вусаты прусак, яшчэ штосьці … Я пакуль дзейны прэзідэнт, ні ў адной краіне не дазволена абражаць людзей. Я ж нікога з вас не абразіў асабіста. Таму не трэба. А калі вы хочаце рознага роду жуллё абараніць, то абараняйце, толькі не са мной.
Ён заклікаў усе пытанні, якія знаходзяцца ў кампетэнцыі ўлады, вырашаць разам з яе прадстаўнікамі, у тым ліку і з прэзідэнтам.
— Я яшчэ не забранзовеў, як вы думаеце. Я адрэагую. Але толькі не акунайце мяне, каб я вам платы рамантаваў.
Што казаў пра канкурэнтаў Лукашэнка
З канца траўня Аляксандр Лукашэнка публічна высказваўся аб сваім стаўленнеі да канкурэнтаў на выбарах-2020.
«Ужо вушы тырчаць у гэтага чалавека [Сяргея Ціханоўскі - заўв. Hrodna.life]. Ён нават не кандыдат у прэзідэнты, за жонку [Святлану Ціханоўскую — заўв. Hrodna.life] там дбае. Разумее ж, што за жонку ніхто не прагаласуе ў Беларусі».
«Гэта нібыта незалежная газета ў Расіі [выданне „Коммерсант“ — заўв. Hrodna.life]. Але мы ведаем, хто яе фінансуе… Нібыта інтэрв'ю бярэ ў аднаго шалудзівага [пра Сяргея Ціханоўскага — заўв. Hrodna.life], інакш не назавеш, які тут ходзіць, крычыць па Мінску больш, ды і ў іншых гарадах».
На нарадзе 4 чэрвеня Аляксандр Лукашэнка, не называючы Валерыя Цапкалы, абвінаваціў яго ў падмане ў сувязі са сродкамі на перадвыбарчую кампанію і параўнаў з кнырам («хракам»):
«Ён прадаў дом свой нейкай кампаніі, яна яму заплаціла грошы, але ён там жыве. Што гэта такое? Гэта фінансаванне перадвыбарнай кампаніі. І ён, нахабнік, выходзіць, і такі чысты, пухнаты. Ён распавядае, што я яго бабулі спадабаўся, таму што ведаў, колькі свінаматка можа нарадзіць парсючкоў. Паўстае пытанне, а табе я чым тады спадабаўся. Чаму ты ад Шушкевіча прыбег да мяне на каленях прасіць? Мы ж на гэта не забыліся».
«І потым, ён проста не разумее, бо колькасць народжаных парсючкоў ад свінаматкі і іх якасць не залежыць ад свінаматкі. Гэта яшчэ залежыць ад кнара. І калі будзе такі кныр, як гэты чалавек, то мёртванароджанымі будуць парасючкі», — цытавала Аляксандра Лукашенка БелТА.
Напярэдадні ператрусаў ў «Белгазпрамбанку» 11 чэрвеня Аляксандр Лукашэнка даручыў сумесна з генеральным пракурорам, Камітэтам дзяржкантролю, іншымі структурамі і пры ўдзеле мясцовых органаў улады «прашарсціць гэтых пузатых буржуяў».
Пасля пачатку следства па справе «Белгазпрамбанка», у Полацку, Лукашэнка назваў аднаго са сваіх канкурэнтаў на выбарах, Віктара Бабарыку, негодяем:
«Што мяне ўразіла: гэты нягоднік, інакш не назаву: я, маўляў, ні пры чым, да мяне прэтэнзій ніхто не мае, гэта яны там…, — сказаў Лукашэнка. — Слухайце, яны ўсё [кіраўнікі кампаній, дзе прайшлі ператрусы. — заўв. Naviny.by] былі не толькі ў яго намеснікамі. Гэта адна шайка-лейка».
Колькі подпісаў налічылі пры праверцы ў Гродзенскім раёне
Дадзеныя па падпісных лістах з колькасцю подпісаў у падтрымку вылучэнцаў у кандыдаты ў прэзідэнты ў гэтую выбарчую кампанію сталі закрытымі, расказваюць праваабаронцы з цэнтра «Вясна». Праверка подпісаў ужо ідзе, але прысутнасць назіральнікаў «не была прадугледжана». Пасяджэнні тэрытарыяльных выбарчых камісій праходзяць па вобласці з 19 па 24 чэрвеня. Колькасць подпісаў агучвалі выбарачна, не па ўсіх прэтэндэнтах.
У Гродзенскай раённай ТВК агучылі колькасць падпісных лістоў і подпісаў здадзеных па 6 прэтэндэнтах. Вядома, што А. Дзмітрыеў сабраў у Гродзенскім раёне 74 подпісы, Т.Канапацкая — 17, А.Лукашэнка — 18 687, С. Ціханоўская — 660, С.Чэрачэнь — 1527, В. Цапкала — 941. Характэрна, што каб менш праводзіць пасяджэння ў сувязі з ростам захворвання каранавірусам у раёне, для праверкі адабралі 20% подпісаў і адразу ж вызначылі яшчэ 15% ад колькасці на наступную праверку, калі спатрэбіцца.
«На шалёную фальсіфікацыю не пайду»
Прэзідэнт сказаў, што не хоча, каб у краіне былі разбураныя мір і стабільнасць.
— Хтосьці ацэньвае гэтую стабільнасць як ненармальную, маўляў, нам такая стабільнасць не патрэбная. Ну, як мог, як умеў, не адзін я, многія з нас стваралі гэтую краіну, і яна такая ёсць. Можа, іншыя зробяць лепш, 9 жнiўня ўсё вырашыцца. І не думайце, што я пайду на нейкую шалёную фальсіфікацыю. Паслухайце, вы што, праз чвэрць стагоддзя прэзідэнцтва мяне за дурня лічыце?
«Ствараў IT-парк уласнымі рукамі»
Лукашэнка падкрэсліў, што выдатна разумее, што адбываецца ў краіне, разбіраецца ў сучасных тэхналогіях у «гаджэтах, айпадах і айфонах».
— Я ствараў гэты IT-парк ўласнымі рукамі, калі вы ўсё сядзелі недзе на кухнях, я хацеў вас сабраць разам. Хацеў даць вам працу, даць пэўныя льготы, каб сюды пайшлі амерыканцы і індусы, якія нас значна апярэджваюць. Я ўсё гэта перажыў і не хачу, каб усё гэта было разбурана. Я хачу, каб вы па кароўніка хадзілі. Не тое, што ваш там альтэрнатыўшчык адзін заявіў: «У кароўник не пайду». А хто пойдзе? Вы пойдзеце? Захочаце 6 мільярдаў экспарту сельгаспрадукцыі, пойдзеце не толькі ў кароўнік. Папаўзеце туды. Я таксама нанюхаўся гэтых кароўнікаў за сваё жыццё, але да гэтага часу хаджу.
Падчас ператрусаў у «Белгазпрамбанку» знайшлі флэшкі
У Брэсце Лукашэнка заявіў, што «карупцыянерам ў краіне рабіць няма чаго», а тым, хто сумняваецца ў вінаватасці (прозвішча Бабарыка так і не прагучала. — заўв. T*T.BY), гатовы арганізаваць сустрэчу ў СІЗА, піша T*T.BY.
— Мецэнат, карціны прывёз дзяржаве, а на паверку што апынулася — іх карціны. А чаму мы вымушаны былі зараз іх прыхапіць? А таму што яны пачалі канцы ў ваду хаваць, пачалі вывозіць грошы, карціны. І калі мы ў банк пайшлі, ведаеце, што знайшлі - галоўнае? Грошы — гэта не галоўнае! Мы знайшлі флэшкі, жорсткія дыскі і мора інфармацыі, і гэтага баяцца іх гаспадары.
