100 00 подпісаў рэальна сабраць нават з невялікай ініцыятыўнай групай, таму што народ актыўна праявіў грамадзянскую пазіцыю. Прэтэндэнт у прэзідэнты і жонка Сяргея Ціханоўскага дала сваё першае інтэрв'ю. Гутарка з ёй з’явілася ў эфіры расійскага тэлеканала «Дождь».
Сяргею Ціханоўскаму пакуль не прад’явілі абвінавачванне. Тэрмін на прад’яўленне абвінавачвання заканчваецца 8 чэрвеня каля 20.00, распавяла Святлана ў інтэрв'ю.
Таксама яна паведаміла аб сваім цяперашнім статусе і поспехах у зборы подпісаў. У яе ініцыятыўнай групе — 230 чалавек. Ездзіць па рэгіёнах Святлана не плануе — кажа, гэтым павінен быў займацца яе муж, але яго 29 траўня затрымалі.
— Я больш, чым упэўненая, што неабходную колькасць подпісаў мы збярэм. Але як адрэагуе ЦВК на маю кандыдатуру — рэгістраваць ці не рэгістраваць — гэтага я, на жаль, спрагназаваць не магу, — сказала Святлана.
Спытаў вядучы і пра 900 000 долараў, якія знайшлі на лецішчы Ціханоўскіх. «Правялі ператрус і нейкім чынам знайшлі вось такую вось буйную суму грошай. Якім чынам яна будзе фігураваць у абвінавачванні - спрагназаваць складана», — сказала Святлана. Магчыма, Сяргею прад’явяць нявыплату падаткаў, лічыць яна.
Святлана сумняваецца, што Сяргей мог зарабіць такую суму камерцыйнай дзейнасцю. Але яна не сцвярджае, што грошы яму падкінулі.
— Калі б былі такія грошы ў сям'і, напэўна, ён не змагаўся за нейкія правы простага народа, — сказала Святлана.
На параўнанне Ціханоўскага з Навальным Святлана адказала словамі мужа: «ён не «беларускі Навальны, а беларускі Ціханоўскі».
— Ці рэальна перамагчы Лукашэнку?
— Не ведаю, магчыма ці не, але мы, народ, вельмі моцна ў гэта верым.
— Гэта значыць, Сяргей можа стаць новым Зяленскім? На падпісках, на блогу, на праглядах выйсці ў палітыку? Але ў выніку прэзідэнтам будзеце вы, калі пераможаце…
— Давайце не будзем зазіраць наперад, давайце жыць сённяшнім днём, таму што сітуацыя мяняецца кожным дзень і незразумела, што будзе заўтра.
Кто такой блогер Сергей Тихановский, который хочет быть президентом Беларуси
Што адбылося ў Гродне ў дзень візіта Ціханоўскага?
У Гродне затрымалі палітычных актывістаў. Увечары 29 траўня на пікеце падчас збору подпісаў за Святлану Ціханоўскую адбыўся інцыдэнт, у выніку якога блогера Сяргея Ціханоўскага і некаторых яго прыхільнікаў затрымала міліцыя. Сярод затрыманых — сябра ініцыятыўнай групы Дзмітрый Фурманаў. Удзельніцу верагоднай правакацыі супраць Ціханоўскага апазналі ў сацсетках.
Затрыманні працягнуліся на наступны дзень. 30 траўня затрымалі актывіста Мікалая Саляніка, які днём раней вёў перамовы з кіраўніцтвам міліцыі і спрабаваў даведацца, за што быў затрыманы і дзе знаходзіцца Ціханоўскі. Праваабарончы цэнтр «Вясна» склаў спіс затрыманых у Гродне. Частку з іх перавезлі ў Мінск.
Гэта не спыніла ініцыятыўную групу Ціханоўскай. Афіцыйна было заяўлена, што падчас інцыдэнту пацярпеў міліцыянт. Узбуджаная крымінальная справа па факце гвалту ў адносінах да супрацоўнікаў органаў унутраных справаў. Нягледзячы на гэта, на наступныя дні да пікету Святланы Ціханоўскай выстраіліся чэргі — людзі стаялі, каб аддаць подпіс, нават пад дажджом.
Праваабаронцы прызналі Сяргея Ціханоўскага і іншых затрыманых у Гродне палітычнымі вязьнямі.
У выніку пад удар патрапілі і выпадковыя людзі. Увечары 29 траўня ў сацсетках пачалося цкаванне выпадковага чалавека, якога прынялі за супрацоўніка органаў у цывільным, які ўдзельнічаў у затрыманні ў Гродне. У дзяржаўных СМІ з другога боку пачалося цкаванне 81-гадовай пенсіянеркі Галіны Філіпаўны, якая падчас стрыму з Савецкай плошчы выказалася супраць Лукашэнкі і ў падтрымку Ціханоўскіх. Пенсіянерку Станіславу Дамшэль, якая 29 траўня таксама была на Савецкай, абвінавацілі ў дробным хуліганстве, але яна не пусціла міліцыю да сябе дадому. Выпадковыя людзі былі і сярод затрыманых на плошчы.
