Першы ў Гродне рэстаран індыйскай кухні «Ганга» адкрыўся 16 траўня на вуліцы Калючынскай. З-за каранавіруса адкрыццё перанеслі на месяц.
Рэстаран усходняй кухні адкрыўся ў тым месцы, дзе яшчэ нядаўна працаваў бар «Малако». Уладальнік установы Вініш Бура запрасіў на адкрыццё толькі блізкіх яму людзей. Адкрываў ён «Гангу» паводле індыйскай традыцыі.
«Каранцін перашкодзіў нашым планам, мы планавалі адкрыцца яшчэ ў красавіку. Але зрабілі гэта толькі цяпер, і першы час будзем працаваць толькі з дастаўкай», — кажа ўладальнік.
Вініш Бура жыве ў Беларусі 8 гадоў, ён родам з Індыі. Спачатку ён вучыўся ў медыцынскім універсітэце, а зараз працуе доктарам у шпіталі і паралельна развівае свой бізнэс — крамы з індыйскімі спецыямі.
«У мяне ёсць сябар у Мінску, які некалькі гадоў таму адкрыў там індыйскі рэстаран. Я падумаў: чаму б у Гродна не адкрыць такое месца. Цікавасць да індыйскіх страў тут ёсць, гэта я бачу па сваіх пакупніка[ у краме. Вельмі многія пытаюцца: дзе пакаштаваць сапраўдныя індыйскія стравы. Вось і нарадзілася ідэя рэстарана».
Свой рэстаран Вініш назваў «Ганга» — у гонар маці і індыйскай ракі Ганг. Установа разлічана на 30 чалавек. Інтэр'ер рэстарана нагадвае тыповыя індыйскія рэстараны ў Еўропе.
«Пакуль бушуе каранавірус, мы будзем працаваць з дастаўкай. У меню ў нас больш за сорак розных страў. Арыентуемся на студэнтаў, для іх у нас зніжкі».
Сёння ў Гродне вучыцца больш за 1000 студэнтаў з Індыі і Шры-Ланкі. Але мэта Вініша пазнаёміць менавіта беларусаў з усходняй кухняй.
«Рэстаран не толькі для студэнтаў з усходніх краін, але і для беларусаў. Хачу іх пазнаёміць з сапраўднай індыйскай кухняй».
Адрас: Калючынская, 12
Сайт: ganagrodno.by
