8 траўня ў Гродне і Лідзе за акцыю кармлення галубоў і сустрэчу з блогерам Сяргеем Ціханоўскім шэраг удзельнікаў засуджаныя да адміністрацыйнага арышту, паведамляе harodniaspring.org.
У Гродне грамадскі актывіст Аляксандр Лаўрэнцьеў будзе за кратамі 9 сутак (цяпер яму прысудзілі 7 сутак арышту плюс 2 сутак у яго было за ранейшае адміністрацыйнае правапарушэнне).
Васіль Калач засуджаны да 5 сутак арышту;
Яўген Разнічэнка — да 6 сутак арышту;
Юрый Шока — да 7 сутак арышту;
Алена Сахарчук — да 6 сутак арышту.
У Гродне міліцыя хацела таксама затрымаць Мікалая Саляніка, які не адчыніў супрацоўнікам дзверы сваёй кватэры. Мікалай Салянік паведаміў у сваім фэйсбуку, што 9 траўня а 12-й гадзіне ён збіраецца выйсці ў горад, каб ушанаваць памяць сваіх блізкіх сваякоў, што загінулі ў Другой сусветнай вайне.
Стала ведама таксама, што міліцыя дзяжурыць ля кватэр і хоча затрымаць яшчэ некалькі чалавек – а менавіта Вольгу Каракіну, Дзмітрыя Фурманава.
У Лідзе органамі незаконна затрыманыя і засуджаныя 5 чалавек:
Алег Краўцоў засуджаны да 7 сутак арышту;
Павал Палейчык — да 7 сутак арышту;
Андрэй Паляковіч — да 7 сутак арышту;
Максім Палонскі — да 7 сутак арышту;
Павел Анціпкін пакуль знаходзіцца ў ізалятары часовага ўтрыманьня да суду 11 траўня.
Сярод лідскіх актывістаў апынуліся работнікі хуткай дапамогі, якія распавядалі на стрымах і ў СМІ праўду аб сваёй працы.
Як дапамагчы лідскім актывістам
Неабыякавыя людзі збіраюць грошы затрыманым лідчанам праз краудфандынг.
– Усе затрыманыя апынуліся ў няпростай сітуацыі і іх сем’ям зараз патрэбна дапамога ў арганізацыі прадуктовых і рэчавых перадач, аплаце рахункаў за знаходжанне ў ізалятарах і г. д, – кажуць яны.
Таксама можна зрабіць перавод праз АРІП-банкаўскія, фінансавыя паслугі-Банкі, НКФА-Беларусбанк-папаўненне рахунку-BY53 AKBB 3014 0000 7095 9421 0000.
Як дапамагчы гродзенцам?
Актывісты прапрацоўваюць гэтае пытанне. Магчыма, таксама створаць збор на molamola.by. Таксама пакінуць дапамогу можна на Кірава, 3 у краме “Адметнасць”.
Затрыманні працягваюцца
Затрыманні не спыніліся і 9 траўня – людзей забіралі з дамоў ці спынялі па дарозе ў Бабруйск, дзе было запланавана правядзенне “Антыпараду”. Поўны спіс затрыманых па гарадах глядзіце тут.
