Ксёндз Ян Пузына. Пальмавая (Вербная) нядзеля 2017. Фота: Яўген Ерчак, TUT.BY
Пробашч касцёла ў Ашмянах Ян Пузына патрапіў у шпіталь з каранавірусам. На каранціне іншыя святары, якія з ім камунікавалі. Усе касцёлы ў раёне адмянілі службы. Раней ксёндз Пузына называў каранавірус «звычайным грыпам» і не адмяніў масавага цалавання крыжа ў Пальмовую нядзелю.
Пра тое, што пробашч касцёла святога Міхала Арханёла ў Ашмянах Ян Пузына знаходзіцца на лячэнні ў шпіталі паведаміла Курыя Гродзенскай дыяцэзіі. Тэсты на каранавірус далі станоўчы вынік.
Паводле інфармацыі дзяржаўнага тэлеграм-канала «Гродно Медиа Group», ксёндз адчуў сябе блага ў касцёле ў нядзелю 26 красавіка, у час абраду бежмавання (інакш мірапамазанне або канфірмацыя — сакрамант, які прымаюць католікі ў падлеткавым узросце, звычайна ў 14−16 гадоў). У шпіталь ён патрапіў 28 красавіка. 1 і 2 траўня эпідэміёлагі вызначылі кантакты 1-га і 2-га ўзроўняў і ва ўсіх узялі тэсты.
Такія абрады не павінны праводзіцца ў перыяд пандэміі. Касцёл прыняў рашэнне ўсе запланаваныя мерапрыемствы перанесці на пазнейшы час. Паводле інфармацыі Hrodna.life, гродзенскі біскуп Аляксандр Кашкевіч з гэтай прычыны адмовіўся ехаць у Ашмяны. Афіцыйна ўрачыстасць павінна была быць перанесена. Але па нейкай прычыне ксёндз Пузына вырашыў яе правесці.
Паколькі сакрамант бежмавання можа даць толькі біскуп, ксёндз Ян папрасіў прыехаць пінскага біскупа Антонія Дзям’янку. Той пагадзіўся і праз два дні, таксама 28 красавіка патрапіў у шпіталь. Тэст на каранавірус аказаўся адмоўным. Прычына шпіталізацыі - кардыялагічнае захворванне. У біскупа Дзям’янкі даўнія праблемы са здароўем, якія абвастрыліся.
Паводле інфармацыі «Гродно Медиа Group» прадстаўнікі Ашмянскага райвыканкама спрабавалі адмяніць бежмаванне як масавае мерапрыемства, але ксёндз Ян Пузына нібыта не выходзіў на кантакт.
У Ашмянскім дэканаце зараз не праводзяць публічныя імшы і іншыя набажэнствы з удзелам вернікаў. Касцёлы адкрытыя для тых, хто хоча індывідуальна памаліцца. Гэта рашэнне прыняла Курыя Гродзенскай дыяцэзіі па рэкамендацыі выканкама.
«Такі каранцін прадоўжыцца 14 дней, як гэта рэкамендуюць санітарныя службы. Калі будзе такая патрэба, то гэты каранцін працягнецца даўжэй», — кажа прэс-сакратар Гродзенскай курыі ксёндз Юрый Марціновіч.
Святары, якія служаць у Ашмянскім дэканаце, знаходзяцца на каранціне. Яны мелі кантакт з ксяндзом Янам. Усяго на каранціне 8 святароў.
Ксёндз Ян Пузына стаў вядомы ў пачатку красавіка, калі Deutsche Welle апублікавала відэа са святкавання Пальмовай нядзелі ў Ашмянах. На ім бачна, як вернікі масава цалуюць крыж, хаця гэта было афіцыйна адменена ў дыяцэзіі.
Ксёндз на відэа здзіўляецца, што людзі ў сур’ёз успрынялі пагрозу каранавіруса. «Рэкамендацыі, якія даюцца цяпер, вельмі падобныя да тых, якія даюцца пры грыпе», — сказаў тады ксёндз Ян.
«Усе масавыя мерапрыемствы згодна з рашэннем біскупа Александра Кашкевіча былі перанесены на пазнейшы час. Не адбыліся ўжо дыяцэзіяльныя дні моладзі, якія былі запланаваны на канец красавіка. У іх звычайна было больш за 1500 удзельнікаў. Не адбудзецца дыяцэзіяльны дзень дзіцяці, на які прыязджала больш за 2500 удзельнікаў. Іншыя мерапрыемствы адмянілі. Спадзяемся, будзе магчымасць усё гэта рэалізаваць пасля спынення пандэміі», — паведамляе ксёндз Юрый.
Урачыстасці першай святой камуніі, якія звычайна адбываліся ў траўні, перанесены ва ўсей дыяцэзіі на верасень. Урачыстасці, звязаныя з удзяленнем сакрамэнту канфірмацыі (бежмавання), адбудуцца таксама ў пазнейшым часе.
Храмы ў Гродзенскай дыяцэзіі адчынены, акрамя Ашмянскага дэканата службы праходзяць у звычайным рэжыме. Святары просяць вернікаў, каб тыя былі ўважлівы і ўжывалі сродкі бяспекі. Пры гэтым вернікі, якія баяцца заражэння каранавірусам, маюць дыспэнсу ад абавязковага ўдзелу ў нядзельных і святочных імшах. Гэта значыць, ім дазволена не прысутнічаць у касцёле.
«Можна смела застацца дома, граху не будзе. Трэба з супольнасцю касцёла яднацца праз сродкі масавай камунікацыі, такім чынам удзельнічаць у літургіі. Віртуальны касцёл — гэта не сапраўдны касцёл, а толькі спосаб трываць у супольнасці», — расказывае Юрый Марціновіч.
Гіды і экскурсаводы ў Беларусі цяпер павінны ведаць асновы дзяржаўнай ідэалогіі. Такое патрабаванне з'явілася ў…
Айцец Андрэй Крот з Гродна быў у дэлегацыі беларускіх святароў, якая сустрэлася з новым пантыфікам.…
Фатаграфія кабінкі для перапранання на пляжы ў Ласосна патрапіла ў рэдакцыю Hrodna.life. Драўляныя балкі ў…
Псіхолага і дырэктарку ліквідаванага Гродзенскага дзіцячага хоспісу Вольгу Вялічку выключылі са спісу дэлегатаў Каардынацыйнай Рады…
Мужчына вяртае ў гняздо буслам птушаня, якое выпала, - такое відэа ў апошні тыдзень набірае…
Гарадскі выпускны пройдзе 13 чэрвеня на Савецкай плошчы. Запланавана ўрачыстае шэсце і выступленні беларускіх артыстаў.…