У Скідзельскага цукровага камбіната новы гендырэктар. Раней ён кіраваў заводамі ў Гродне

На Скідзельскі цукровы камбінат прызначылі новага кіраўніка. Ім стаў Уладзімір Белавусаў, інфармуе прэс-служба канцэрна «Белдзяржхарчпром».

Апошнія паўгода Уладзімір Белавусаў працаваў намеснікам генеральнага дырэктара па рэалізацыі ААТ «Гродзенскі шклозавод». Да гэтага ён быў генеральным дырэктарам Гродзенскага лікёра-гарэлачнага завода. Таксама Уладзімір Белавусаў - чалец Гродзенскага гарадскога савета дэпутатаў па Віленскай выбарчай акрузе № 6.

Папярэдні генеральны дырэктар Скідальскага цукровага камбіната Дзмітрый Ягораў стаў фігурантам так званай «цукровай справы».

«Цукровая справа»

Кіраўнікі ўсіх цукровых заводаў краіны былі затрыманыя яшчэ ў канцы студзеня і зараз знаходзяцца ў СІЗА, піша t*t.by. Пад вартай апынуліся Дзмітрый Ягораў (Скідзельскі завод), Міхаіл Крыштаповіч (Гарадзейскі камбінат), Віктар Міронаў (Жабінкаўскі цукровы завод), Мікалай Пруднік (Слуцкі камбінат). Распачатыя крымінальныя справы па ч. 3 арт. 430 КК (Атрыманне хабару ў асабліва буйным памеры) і па ч. 2 арт. 431 (Дача хабару ў буйным памеры). Адным з фігурантаў «цукровай справы» таксама з’яўляецца былы намеснік начальніка галоўнага ўпраўлення па барацьбе з арганізаванай злачыннасцю і карупцыяй МУС Уладзімір Ціхіня.

Чытайце таксама: Лукашэнка пра «цукровую справу»: Я сам сказаў вярнуць самалёт і дастаць іх адтуль

Паводле інфармацыі КДБ, прадпрыемствы адгружалі прадукцыю на экспарт Беларускай цукровай кампаніі, значная яго частка сыходзіла «падкантрольным пасярэднікам». Затым гэты ж цукар перапрадавалі даражэй на сваім жа рынку. Акрамя таго, выдаткі на вытворчасць павялічваліся за кошт продажу расійскім пасярэднікам ўпакоўкі па завышаным кошце. «Штогод сумы хабараў вылічаліся сотнямі тысяч долараў», — заявілі ў КДБ.

Чытайце таксама: «Трыццаць сёмы год ці што?» Што кажуць у Скідалі пра зьнікненьне дырэктара цукровага заводу

6 лютага стала вядома, што фігурантам «цукровай справы» ўжо прад’яўлена абвінавачанне.