Гандлёвы цэнтр «Палац» бізнесмэна Станіслава Сямашкі адкрыецца 14 сакавіка на Калючынскай. Гэта другі аб’ект, які Сямашка запускае ў цэнтры Гродна за апошнія два гады.
Новы будынак узвялі з нуля. Ён з’явіўся на пустцы насупраць турмы, побач з месцам, дзе ў савецкія гады стаяў падобны будынак. Зямлю пад будаўніцтва бізнесмэн купіў за 255 тысяч долараў у канцы 2018 года. Пасля доўгіх абмеркаванняў яму ўзгаднілі праект. Будынак пабудавалі хутка — працы ішлі з траўня да лютага.
Будынак на Калючынскай, 21 у савецкія гады. Побач з гэтым месцам Сямашка ў 2019 годзе пачаў будаваць новы аб’ект. Вонкава ён павінен быў нагадваць старую пабудову
Фота да пачатку будаўніцтва. Тэрыторыя, дзе ў будучыні з’явіцца новы аб’ект Сямашкі. Злева будынак, які бізнесмэн аднавіў у 2018 годзе
Новы будынак на Калючынскай, які Сямашка пабудаваў за паўгода
На цокальным паверсе новага гандлёвага цэнтра будуць працаваць аб’екты грамадскага харчавання: сушы-бар «Сушы-Вок», бар «CRAFT» і бар-рэстаран «Paradise». На першым — крамы і кафэ-пякарня. На другім паверсе таксама адкрыюцца гандлёвыя кропкі, на трэцім размесцяцца паслугі. У канцы 2019 года стала вядома, што Сямашка купіў дом купца Мураўёва, які знаходзіцца ў непасрэдным суседстве двух іншых яго аб’ектаў. Цяпер распрацоўваецца праект рэканструкцыі будынка.