БТ паказала фільм пра «цукровую справу». У чым абвінавачваюць дырэктараў?

Штогадовы памер хабараў фігурантам «цукровай справы» лічыўся сотнямі тысяч долараў ЗША. Такую інфармацыю агучылі ў эфіры БТ-1, піша n*.by.

Сцвярджаецца, што шырмай для карупцыйнай схемы стала Беларуская цукровая кампанія.

Дырэктары чатырох беларускіх цукровых заводаў нібыта ўступілі ў злачынную змову з кіраўніком Беларускай цукровай кампаніі Кірылавым, а таксама прадстаўніком расійскіх камерцыйных структур Кананенкам. Сцвярджаецца, што хабары плацілі за арганізацыю адгрузкі беларускага цукру ад Беларускай цукровай кампаніі ў адрас пэўных папярэдне ўзгодненых камерцыйных структур. Штогод сумы хабараў лічыліся сотнямі тысяч долараў ЗША.

Крымінальная схема працавала наступным чынам: чатыры заводы адгружалі ўвесь экспартны аб’ём Беларускай цукровай кампаніі. Далей значная частка сыходзіла падкантрольным пасярэднікам.

У сюжэце сцвярджаюць, што за гэта Кананенка пры дапамозе Кірылава перадаваў дырэктарам заводаў незаконнае грашовае ўзнагароджанне ў памеры ад $ 1 да $ 2,5 за кожную тону адгружанай прадукцыі.

Паводле аператыўных даных, незаконны даход лічыўся мільёнамі долараў.


Чытайце таксама: Лукашэнка пра «цукровую справу»: Я сам сказаў вярнуць самалёт і дастаць іх адтуль


Паводле следства, у Расеі была створана фірма-пракладка для пастаўкі сыравіны «Палімір», а ў Беларусі — завод-манапаліст па вытворчасці мяшкоў для цукру «Еўратарэкс». Мясцовы завод вельмі хутка пачаў працаваць у нуль, увесь прыбытак заставаўся на рахунках расійскага пасярэдніка, гатоўка знімалася і размяркоўвалася паміж змоўчшыкамі. Фактычным арганізатарам схемы выступіў дырэктар Гарадзейскага цукровага камбіната Міхаіл Крыштаповіч. У падзеле прыбытку ўдзельнічалі таксама дырэктар Беларускай цукровай кампаніі Дзмітрый Кірылаў і расійскі прадпрымальнік Кананенка, які і ажыццяўляў фактычны кантроль над «Палімірам». Дырэктары астатніх трох заводаў таксама былі ўцягнутыя ў супрацьпраўную дзейнасць, сцвярджаецца ў сюжэце.

Паводле тэлеканала, летась сумарны «мінус» чатырох цукровых заводаў у Жабінцы, Скідзелі, Гарадзеі і Слуцку дасягаў 200 млн рублёў.

Галоўны змагар са злодзеямі ў законе Ціхіня- таксама ўцягнуты ў «цукровую справу»

Як адзначаецца ў тэлесюжэце, да карупцыйнай схемы ў цукровай галіне меў дачыненне былы намеснік начальніка ГУБАЗіК МУС Уладзімір Ціхіня: легендарны змагар з бандытызмам у 1990-х і 2000-х нібыта згадзіўся за ўзнагароджанне страхаваць цукровую мафію і яе схему. У эфіры была паказана аператыўная здымка.

Начальнік аддзела следчага ўпраўлення КДБ Канстанцін Бычак растлумачыў, што Уладзімір Ціхіня паведамляў удзельнікам злачыннай групы звесткі аб аператыўна-вышуковых мерапрыемствах, даваў парады па канспірацыі, зачыстцы слядоў супрацьпраўнай дзейнасці.

Паводле звестак тэлеканала, менавіта Уладзіміра Ціхіню, як самага дасведчанага, затрымалі першым з усіх удзельнікаў «цукровай мафіі».

«Камітэтам дзяржаўнай бяспекі распачатыя крымінальныя справы па ч.3 арт.430 (атрыманне хабару ў асабліва буйным памеры) у дачыненні да службовых асоб і па ч.2 арт.431 (даванне хабару ў буйным памеры) КК — у дачыненні да камерсантаў, якія давалі хабару. Цяпер расследаванне па крымінальнай справе працягваецца. Пад грузам неабвержных доказаў фігуранты даюць прызнальныя паказанні і супрацоўнічаюць са следствам», — праінфармаваў Канстанцін Бычак. Пакаранне — да 15 гадоў пазбаўлення волі.

Апошнія запісы

На могілках у Гродне з’явілася пліта расійскага салдата, які ваяваў супраць Украіны

Пліта Ведніка Леаніда Анатольевіча, які, верагодна, загінуў на вайне супраць Украіны, з'явілася ў калумбарыі на…

23 красавіка 2025

Як будзе выглядаць стогадовы дом у стылі канструктывізму на Міцкевіча пасля перабудовы: праект

Драўляны будынак у стылі канструктывізму 1930-х на Міцкевіча, 1 у Гродне перабудуюць у трохпавярховы гатэль…

23 красавіка 2025

У Гродне можна зрабіць здымак райка вока — паслуга падабаецца парам

Макраздымак райка (рус. - радужки) вока можна зрабіць у Гродне на вул. Будзённага. Закаханым прапануюць…

23 красавіка 2025

У Беларусі распрацуюць экскурсію па храмах і могілках Воранаўшчыны

У Нацыянальным агенцтве па турызме прапануюць распрацаваць экскурсію "Па святынях Воранаўшчыны". Аўтар зможа зарабіць 2820…

23 красавіка 2025

Дом быту ў Гродне прадалі на аўкцыёне з пятай спробы

Раней Дом быту на Замкавай, 4 спрабавалі прадаць ужо чатыры разы. У час аўкцыёну, які…

22 красавіка 2025

У гродзенскіх гатэлях амаль не засталося месцаў на травеньскія святы

У Threads беларус Дзяніс выказаў здзіўленне наконт таго, што ў гасцініцах і гатэлях Гродна ўсе…

22 красавіка 2025