У нядзелю 2 лютага “Нёман” праводзіў заключны матч на турніры “Белазавец” у якім сустракаўся з “Віцебскам”.  У асноўны час матчу каманды згулялі ў нічыю – 0:0, у серыі пенальці дакладней былі гродзенцы – 5:4.

У выніку у падапечных Ігара Кавалевіча на турніры ў Жодзіне 3 месца. Усе гульні ў асноўны час скончыліся унічыю.

“Неман” – “Слуцк” – 1:1
“Неман” – “Тарпеда-БелАЗ” – 1:1
“Неман” – “Віцебск” – 0:0 (5:4)

У выніку ў гродзенскай каманды трэцяе выніковае месца ў зімовым турніры ў Жодзіне. Першае месца ў “Слуцка”.

Галоўны трэнер “Нёмана” Ігар Кавалевіч пасля турніру падзяліўся вынікамі і планамі каманды на бліжэйшы час.

– Падвядзіце вынік турніру ў Жодзіне.

– Мы хацелі паглядзець у якіх кандыцыях знаходзяцца гульцы, якія засталіся ў камандзе і таксама ўбачыць, што з сябе ўяўляюць тыя, хто прыехаў на прагляд. Гэтую задачу, лічу, мы выканалі.

– Хто з тых, хто быў на праглядзе, застанецца?

– Хацелася б працягнуць супрацоўніцтва з Шыгайбаевым. Мяне ён уразіў. Яму 18 гадоў і для свайго ўзросту ён глядзіцца нядрэнна. Паглядзім, як пройдуць перамовы. На збор у Гродна адправяцца Містулаў, Свэн і Іваноў. Астатнім жадаю ўдачы ў кар’еры.

– Вядома штосьці з нагоды пашкоджанняў Курганскага і Лягчыліна?

– Аляксей прапусціць тыдзень-паўтара. Сяргей – тыдні тры.

– Ці задаволены тым, як сябе паказваюць пачаткоўцы?

– У цэлым так. Складана, вядома, глядзець па трох таварыскіх сустрэчах, але тое, што я ўбачыў, мяне задаволіла. Марушыч яшчэ ў мінулым сезоне паказаў, што з’яўляецца моцным гульцом. Пасевіч таксама выглядаў годна, але будзем працаваць над яго тактычнымі дзеяннямі.

– Якія ў каманды бліжэйшыя планы?

– У хлопцаў будзе два выходных, потым заязджаем у Азёры. 8-га лютага едзем у Вільню, згуляем з “Жальгірысам”. 12-га да нас павінны прыехаць “Смалявічы”.