На мяжы двойчы канфіскавалі гарбату з марыхуанай

Адразу дзве спробы правезці гарбату «Relax», якая змяшчае каноплі, былі выяўлены на беларуска-літоўскай мяжы. Першая адбылася 15 лістапада ў пункце пропуску «Прывалка». На заднім сядзенні аўтамабіля «Mercedes», які ехаў на ўезд у Беларусь, пагранічны нарад знайшоў дзве ўпакоўкі «Relax». Кіроўца аўто — 21-гадовы грамадзянін Літвы — заявіў, што купіў заспакойвальны напой у самай звычайнай краме, паведамляе gpk.gov.by.

На наступны дзень у пункце пропуску «Беняконі» такая ж сітуацыя адбылася з грамадзянінам Беларусі. «Audi» пад кіраўніцтвам 23-гадовага жыхара Гродзенскай вобласці накіроўваўся на ўезд у краіну. Пры аглядзе багажніка з выкарыстаннем службовага сабакі была выяўлена ўпакоўка такой жа гарбаты.

У абодвух выпадках травяная гарбата канфіскавана праваахоўнікамі і накіравана на экспертызу. Адказнасць за перамяшчэнне наркатычных сродкаў прадугледжана артыкулам 328−1 КК у выглядзе пазбаўлення волі.