Сёлета найстарэйшы тэатр Беларусі, Нацыянальны акадэмічны тэатр імя Янкі Купалы ў Мінску, распачынае свой соты тэатральны сезон. У гонар гэтага адбыліся гастролі тэатра. У Гродна прывезлі “Паўлінку” і “Рэвізор”. Паказы адбыліся 25 і 26 кастрычніка.
– “Паўлінка” з 44-га года ідзе на нашай сцэне. Гэта кніга рэкордаў Гінеса – палічыце самі, колькі год яна ўжо ідзе. Гэта наш брэнд і яе заўсёды добра наведваюць, – тлумачыць выбар мастацкі кіраўнік Мікалай Пінігін. – “Рэвізор” – гэта адносны свежы наш спектакль. Лаўрэат V Рэспубліканскага конкурсу тэатральнага мастацтва “Нацыянальная тэатральная прэмія”.
– Гэта сапраўды самыя масавыя пастаноўкі Купалаўскага тэатру. Нашы партнеры – Гродзенскі драматычны тэатр – звярнуліся да нас з просьбай прадставіць іх гродзенскаму гледачу. І мы станоўча да гэтага паставіліся, – кажа Генеральны дырэктар тэатра Павел Латушка.
“Паўлінка” – гэта ўжо “візітоўка” тэатра. Яна адкрывае кожны сезон Нацыянальнага акадэмічнага тэатра. Усе маладыя акторы, якія прыходзяць у трупу, праходзяць праз гэты спектакль. Яго можна паглядзець тры-чатыры разы кожны месяц. “Паўлінку” збіраюцца ўнесці ў Нацыянальны спіс нематэрыяльнай культурнай спадчыны Беларусі. Такую прапанову ініцыююць перад Мінкультам і Саветам Міністраў. Пытанне наконт Кнігі рэкордаў Гінэса таксама абмяркоўваецца. Спачатку прааналізуюць, ці ёсць там больш старэйшыя пастаноўкі. І, магчыма, пададуць заяўку.
“Рэвізор” – таксама папулярная пастаноўка. Перыядычна набыць квіткі на яе вельмі цяжка. “Нас добра наведваюць людзі”, – сціпла кажа Мікалай Пінігін. І тлумачыць проста: “Гэта класіка, якая папулярная ва ўсе часы”. Гэта не адзіная пастаноўка на Гогалю. Таксама ў мінскім тэатры можна паглядзець “Ноч на Каляды”.
– Гродна- гэта заходняя культурная сталіца Беларусі. Тут глядач патрававальны, які любіць культуру, шануе культуру. Для нас гэта таксама творчы выклік – прадставіць нашыя спектаклі гродзенскаму гледачу, – кажа Павел Латушка.
Ён дадае, што ў тэатры зацікаўленыя ў пашырэнні рэгіянальных сувязаў. Яны ўжо выступалі ў Слоніме, Маладзечна. Бліжэйшым часам плануе наведаць Бабруйск, Гомель, Салігорск. І будуць пашыраць геаграфію выступленняў Купалаўскага тэатра ў Беларусі і за яе межамі. У планах – Парыж, Вільня, Кіеў, Масква.
Пакуль у трупы гастролі, у Мінску можна паглядзець маленькія спектаклі на два-тры чалавекі. Таксама ў тэатры зацікаўленыя не толькі самім гастраліраваць, але і каб партнеры да іх прыязджалі. Таму на пытанне, ці паедзе Гродзенскі драматычны тэатр на гастролі ў Мінск, Павел Латушка паабяцаў падумаць.
У тэатры адзначаюць рост наведвальнасці. За апошні час яна павялічылася на 35 адсоткаў. Каб прыцягнуць гледача, у тэатры запусцілі трансляцыі выступаў. У планах – 11 анлайн-пастановак. Далей будуць глядзець на водгукі гледачоў. У тэатры спадзяюцца, што такія трансляцыі паўплываюць на вынік наведвання тэатра.
