Парушэнні пры падрыхтоўцы да асенне-зімовага перыяду выяўленыя ў Гродзенскай вобласці, паведамілі БЕЛТА ў Камітэце дзяржаўнага кантролю Гродзенскай вобласці. Нягледзячы на тое, што ацяпляльны сезон у рэгіёне ўжо пачаўся, па некаторых напрамках праца ідзе з адставаннем. Тычыцца гэта перш за ўсё замены цепласетак.
«Напрыклад, энергетыкі заданне па замене цепласетак выканалі. А вось арганізацыямі ЖКГ у рэгіёне пры заданні да 20 верасня замяніць 85,5 км сетак фактычна пераклалі каля 55 км або 65% ад запланаванага», — адзначылі ў КДК Гродзенскай вобласці. Не забяспечваецца своечасовае выкананне работ па перакладцы цепласетак у адпаведнасці з заданнем у Бераставіцкім, Навагрудскім і Лідскім раёнах.
Найбольш складаная сітуацыя склалася ў абласным цэнтры, дзе было заменена менш за палову ад даведзенага задання. У КДК рэгіёну звярнулі ўвагу на абгрунтаваныя скаргі гараджан на працу камунальнікаў: некаторыя будаўнічыя пляцоўкі ў дварах выглядаюць, як поле бою.
Акрамя таго, у вобласці несвоечасова выконваюцца работы па капітальным рамонце жылых дамоў. Па асобных аб’ектах не завершаныя дахавыя работы, што, улічваючы восеньскае надвор’е, можа прывесці да негатыўных наступстваў.
«Шмат парушэнняў выяўлена Камітэтам пры правядзенні маніторынгу падрыхтоўкі жыллёвага фонду да ацяпляльнага сезона. Гэта і неачышчаныя ад моху дахі, і пабітыя ў пад’ездах і падвалах вокны, выламаныя дзверы, частковая адсутнасць ізаляцыі на цеплавых сетках у падвалах, праходжанне водаправодных труб. Часам падвальныя памяшканні проста захламлены. Такія парушэнні выяўлены ў Гродне, у Бераставіцкім, Ваўкавыскім, Карэліцкім і Шчучынскім раёнах», — распавялі ў КДК Гродзенскай вобласці. Акрамя таго, не ўсімі арганізацыямі ЖКГ забяспечваецца належнае захоўванне мясцовых відаў паліва. У прыватнасці, у Ваўкавыску і Бераставіцы выяўлены факты захоўвання дранкі пад адкрытым небам.
Пытанне ходу падрыхтоўкі арганізацый вобласці да асенне-зімовага перыяду 2019−2020 гадоў было разгледжана на калегіі Камітэта дзяржаўнага кантролю Гродзенскай вобласці. Па выніках пасяджэння дадзены канкрэтныя даручэнні старшыням гар- і райвыканкамаў, кіраўнікам арганізацый ЖКГ па прыняцці дзейсных мер і забеспячэнню гатоўнасці аб’ектаў да працы.
