У рэдакцыю Hrodna.life звярнулася гродзенка Алена, якая расказала, што яе дачка і іншыя навучэнцы Гуманітарнага каледжа засталіся без гарачых абедаў. Прыватнае кафэ «Містэрыя», якое працавала на цокальным паверсе, зачынілася, а наўзамен студэнтам нічога не прапанавалі.
Кафэ «Містэрыя» прапрацавала ў гуманітарным каледжы ўсяго два гады. Адкрывалася ўстанова з баямі. Прыватніку давялося прайсці многія інстанцыі, каб запусціць свой праект. Планавалася, што «Містэрыя» ў першай палове дня будзе працаваць як сталовая для студэнтаў, а ў вячэрні час — як кафэ для гараджан. Апошняе рэалізаваць не ўдалося.
«На адных студэнтах мы не выцягнем, таму хочам прыцягваць да сябе гараджан. Але каб працаваць у вячэрні час, трэба прайсці ўсе ўзгадненні. Мы толькі адну шыльду ўзгаднялі амаль паўгода. Алкаголь мы не прадаем, будзем выцягваць кафэ ў вячэрні час фастфудам і мерапрыемствамі», — распавядала у 2018 годзе прадстаўніца кавярні Наталля Бернатовіч.
Як сталовая кафэ не выцягнула і прыватніку прыйшлося зачыніцца перад новым навучальным годам. Студэнты засталіся без гарачых абедаў.
«Кафэ збанкрутавала, а наўзамен нічога. Нават буфета ў навучальнай установе няма, — распавядае чытачка Алена. — І сядзіць моладзь з 8.30 да 15.50 без перапынку на абед. Перапынак дадатковы нават не зрабілі, каб можна было збегаць дзе-небудзь перакусіць».
У навучальнай установе ведаюць пра праблему з харчаваннем і імкнуцца яе вырашыць з пачатку навучальнага года. Але прыватнікі пакуль не хочуць арандаваць былое памяшканне кафэ «Містэрыя».
«Яшчэ ў верасні мы правялі з бацькамі гутарку і распавялі пра праблему. Прасілі і ў іх дапамогі ў пошуку арандатараў. А з імі цяпер складана, — распавядае дырэктар Гуманітарнага каледжа Наталля Валковіч. — Адкрывалі „Містэрыю“ прыватныя асобы і зачыніліся яны з-за праблем. Пра гэта яны нам паведамілі ў канцы жніўня. Мы спрабавалі стварыць ім умовы для працы ў вячэрні час, звярталіся ў Міністэрства адукацыі, але на заканадаўчым узроўні нічога не атрымалася. Шкада. Усе разам мы зрабілі рэальна добрае кафэ і вельмі спадзяваліся, што ўстанова працягне працу. Дзеці з задавальненнем там сілкаваліся».
Студэнты каледжа ў стварэнні кафэ «Містэрыя» прымалі непасрэдны ўдзел — дызайн інтэр'еру і назва гэта іх заслугі. Таксама яны прыносілі ў кафэ старыя рэчы для стварэння неабходнай атмасферы.
«Цяпер мы шукаем новых арандатараў. Зацікаўленыя прыватныя асобы прыходзяць і глядзяць памяшканне. Усё ў працэсе. Буфета ў нас пакуль няма, дзеці вымушаныя хадзіць у бліжэйшы магазін або сталовую ўніверсітэта. Калі не знойдзем арандатара на ўласную сталовую, то зробім буфет. Пытанне гэта вырашыцца ў бліжэйшы час», — дадала Наталля Валковіч.
Паводле заканадаўства прафесійна-тэхнічныя навучальныя ўстановы кормяць навучэнцаў. Ім вылучаюць на гэта дзяржаўныя сродкі. Гуманітарны каледж адносіцца да сярэдне-спецыяльных установаў і там навучэнцы атрымліваюць стыпендыю замест харчавання.
У цяперашні час у гуманітарным каледжы ствараюць памяшканне для прыёму ежы для тых, хто прыносіць абеды з сабой.
Новы сувенір у выглядзе "раскладанкі" са знакавымі аб'ектамі Гродна ствараюць улады. Яго выканаюць у выглядзе…
Некалькі сотняў Дзядоў Марозаў, Снягурак, сабачак, вавёрачак і разнастайных іншых персанажаў 20 снежня прайшлі ад…
Трохпакаёвая кватэра знаходзіцца на вуліцы Савецкіх Пагранічнікаў. Сцены ў ёй абвешаныя рэпрадукцыямі, дзвярныя праёмы выкананы…
Спецыяльнае праграмнае забеспячэнне для сачэння за актыўнасцю ў камп'ютарах закупляе Гродзенскае агенцтва па дзяржаўнай рэгістрацыі…
У Гродне рэканструююць тэрыторыю, прылеглую да вадаёма па вул. Рэпіна. Там жа ўладкуюць дзіцячую інклюзіўную…
У Гродне адкрылася выстава, прысвечаная мясцоваму ўраджэнцу мастаку Льву Баксту. Экспазіцыю размясцілі ў харальнай сінагозе,…