Алень святога Губерта, рысь і зубр. Глядзіце, як змяніўся дворык Гродзенскага дзіцячага хоспіса

Сем жывёл з Чырвонай кнігі, якія радзей за ўсё сустракаюцца ў Беларусі, ад 24 верасня пасяліліся ў дворыку дзіцячага хоспіса. Гродзенскія мастакі іх размалявалі і апрацавалі ад дажджу і снегу. Так хоспіс будзе адукоўваць людзей і паляпшаць гарадскую прастору.

— Хацелася праектам паказаць, што нам ёсць чым ганарыцца. І гэта падарунак ад мастакоў нам — усім, хто будзе прыходзіць у каляровы дворык з дзецьмі, глядзець з вуліцы. І мне здаецца, гэта такая вельмі добрая гісторыя пра развіццё гарадской прасторы — калі можна нестандартна падыходзіць да гэтага, падгледзець у краінах, якія гэта робяць лепш, і сумясціць з тым патэнцыялам, з тымі мастакамі, якія ёсць у нас у горадзе, — кажа дырэктарка хоспіса Вольга Вялічка.

Міні-праекту ўжо каля года. Стваральнікі выбралі з Чырвонай кнігі сем жывёл, якія сустракаюцца ў краіне радзей за ўсё. У плоскіх арт-аб'ектах вырашылі распавесці пра кнігу і праблемы не столькі сацыяльныя, колькі экалагічныя.

Сярод жывёл — вавёрка, алень, мядзведзь, рысь, барсук, воўк і зубр. Выразаць аб’екты дапамог Будаўнічы ліцэй. Мастакі разабралі аб’екты і загрунтавалі, каб захаваць ад дажджу і снегу. І зараз яны ўпрыгожваюць панадворак.

Гэты праект натхніў арганізацыю перайменаваць хоспіс.

— 19 верасня хоспісу споўнілася 11 гадоў. Мы думалі пра вынікі 10-гадовай працы. Па вопыцу калег з іншых хоспісаў іншых краін мы зразумелі, што ва ўсіх было імя. Сталі думаць, як назваць. Мы прыдумалі праект з жывёламі і нам здалося, было б правільным, каб Гродзенскі дзіцячы хоспіс насіў імя патрона Гродна. Цяпер мы — Гродзенскі дзіцячы хоспіс імя святога Губерта. Мяркуем, што святы Губерт мог бы стаць аб’яднаўчым сімвалам для ўсяго горада, а не толькі турыстычнай сферы, — кажа Вольга Вялічка.

Святы Губерт сабраў сяброў і незвычайных звяроў у дворыку на Кірава