Ілюстратыўнае фота
У Беларусі плануецца ўзмацніць пакаранне для п’яных кіроўцаў, у прыватнасці за ДТЗ са смяротным зыходам. Пра гэта карэспандэнту БЕЛТА паведаміла афіцыйны прадстаўнік Генеральнай пракуратуры Анжаліка Курчак.
Генпракуратура сумесна з Саветам Міністраў, Вярхоўным судом і Адміністрацыяй Прэзідэнта падрыхтавала прапановы аб узмацненні адказнасці за правапарушэнні, учыненыя ў стане алкагольнага ап’янення. Так, плануецца ўнесці змены ў Крымінальны кодэкс. Зараз кіроўцу за п’янае ДТЗ, калі па яго віне чалавек загінуў або атрымаў цяжкія траўмы, пагражае да сямі гадоў пазбаўлення волі. У выпадку прыняцця паправак пакаранне стане больш жорсткім — пазбаўленне волі на тэрмін ад 3 да 8 гадоў. Новаўвядзенне закране і правілы бяспекі руху або эксплуатацыі маламерных судоў. Такое ж пакаранне плануецца прадугледзець і для п’яных судакіроўцаў за няшчасныя выпадкі на вадзе са смяротным зыходам. Зараз санкцыя ч.4. ст. 316 КК — гэта пазбаўленне волі на тэрмін да сямі гадоў.
Акрамя таго, прапануецца п’яных кіроўцаў - вінаватых у смяротных ДТЗ, а таксама тых, хто перадаў нецвярозаму транспартны сродак, пазбаўляць права кіравання ім на тэрмін да 8 гадоў (цяпер да 5 гадоў).
Шэраг паправак плануецца ўнесці ў КоАП і ПВКоАП. У арт.18.16 Кодэкса аб адміністрацыйных правапарушэннях прапануецца прапісаць дыферэнцыраваную адказнасць у залежнасці ад канцэнтрацыі алкаголю ў крыві ці парах выдыханага кіроўцам паветра. ПВКаАП (ч.8 ст. 8.7, накладанне арышту на маёмасць) плануецца дапоўніць нормай, якая дазваляе накладаць арышт на транспартны сродак кіроўцы, які трапіўся на п’янай яздзе, перадаў нецвярозаму права кіравання, а таксама сеў за руль без правоў.
Прапанаваныя ініцыятывы ўключаны ў праект закона «Аб змяненні кодэксаў па пытаннях адміністрацыйнай і крымінальнай адказнасці». Ён падрыхтаваны Нацыянальным цэнтрам заканадаўства і прававых даследаванняў і цяпер праходзіць узгадненне ў зацікаўленых дзяржаўных органах. Плануецца, што ў Палату прадстаўнікоў папраўкі паступяць у красавіку 2020 года.
Анжаліка Курчак падкрэсліла актуальнасць заканадаўчых мер, накіраваных на ўзмацненне адказнасці за правапарушэнні, учыненыя ў стане алкагольнага ап’янення. «Сітуацыя застаецца напружанай. У прыватнасці, па-ранейшаму значная колькасць крымінальных злачынстваў і адміністрацыйных правапарушэнняў, звязаных з парушэннем правілаў дарожнага руху нецвярозымі кіроўцамі», — канстатавала афіцыйны прадстаўнік Генеральнай пракуратуры.
З 5 красавіка ў Гродне талоны на праезд у гарадскім грамадскім транспарце даражэюць на 10…
У Гродне на Віленскай, 37 адкрыўся новы буцік-гатэль і рэстаран The Cult - і выклікаў…
Пакуль сады толькі заквітнеюць, ва ўстановах і крамах Гродна падрыхтавалі вясновыя фотазоны. Часта гэта гронкі…
На Савецкай вуліцы каля 80% падвалаў задзейнічаны пад бізнес, прыводзіць статыстыку газета “Гродзенская праўда”. Пры…
Уладальнікі гродзенскіх кавярань «Крепкий белый» і «Крепкий черный» запускаюць школу барыста. Летась арганізатары ўжо праводзілі…
Гродзенец Ігар Апякун канструюе мэблю для круізных лайнераў - стварае прататыпы праз спецыяльную праграму. Ігар…