У Гродне стартавалі свае «Еўрапейскія гульні»: у нядзелю перакрыюць цэнтр горада

Юнацкі чэмпіянат Еўропы па спартыўным арыентаванні пачаўся ў Гродне 28 чэрвеня. Такую спартыўную падзею горад прымае ўпершыню. На спаборніцтвы прыехала 489 удзельнікаў з 32 краін.

Чэмпіянат еўрапейскі, але адкрыты, таму сярод удзельнікаў ёсць нават Новая Зеландыя.

Калі і дзе перакрыюць рух?

У першы дзень удзельнікі змагалася на доўгай дыстанцыі. Спаборніцтвы прайшлі пад Гродна: у Сапоцкіне і Радзівілках. На другі дзень па вёсцы Стрыеўка і ўздоўж возера Рыбніца запланаваная камандная эстафета.

У апошні дзень — 30 чэрвеня — чэмпіянат перамесціцца ў цэнтр Гродна. Двухкіламетровы спрынт па цэнтральных вуліцах горада пачнецца ў 9.30 і скончыцца ў 12.15 на адным і тым жа месцы — Савецкай плошчы.

30 чэрвеня на час спаборніцтваў будзе перакрытая частка вуліц у цэнтры Гродна. Рух аўтамабіляў будзе забаронена па вуліцах Замкавай, Урыцкага і Гараднічанскай. Уезд аўтамабіляў будзе забаронены да паркоўкі ля помніка Сакалоўскага на Дамініканскай.

Што гэта яшчэ за спартыўнае арыентаванне?

Удзельнікам забегу даецца карта мясцовасці: на ёй пазначаныя спецыяльныя кантрольныя пункты, на якіх у пэўным парадку павінен адзначыцца спартсмен. Знайсці іх няпроста.

У пунктах, дзе павінны адзначацца спартсмены, усталяваная бескантактная сістэма кантролю.

У першы дзень заўзятары маглі назіраць за ўдзельнікамі ў рэжыме рэальнага часу пры дапамозе GPS-трэкераў, якія раздалі лідарам груп. Перамяшчэнне адлюстроўвалася на інтэрактыўнай карце.