Лёс Дома быту абмяркоўвалі на нарадзе па будаўніцтве і рэканструкцыі ў Гродзенскім аблвыканкаме 26 чэрвеня. Улады лічаць, што ён не ўпісваецца ў гістарычны цэнтр і яго трэба знесці. Пра лёс будынка мы пагаварылі з яго ўладальнікам — прадпрыемствам «Сілуэт».
З пачатку 2019 года ў Гродне ходзяць чуткі аб зносе Дома быту, але пра якую-небудзь канкрэтыку ніхто сказаць не можа — нават кіраўніцтва горада. Сёння будынкам валодае дзяржаўнае прадпрыемства «Сілуэт», многія памяшканні здаюцца ў арэнду. Каб знесці Дом быту, горад павінен даць прадпрыемству раўнацэнную пабудову. Такой яшчэ няма.
«Па-першае, ніхто нас пакуль не зносіць. Ходзяць толькі размовы пра гэта, а калі надумаюць знесці, то спатрэбіцца яшчэ шмат гадоў і сродкаў. Трэба зрабіць яшчэ спецыяльны пашпарт для гэтага, — распавядае дырэктар прадпрыемства „Сілуэт“ Ірына Хамко. — Па-другое, Дом быту гэта ўласнасць „Сілуэта“ і проста так знесці горад нас не можа. Мэр горада нам пакуль нічога не казаў. Чуткі, якія з’яўляюцца ў інтэрнэце, толькі шкодзяць нашаму прадпрыемству — у нас жа велізарная вытворчасць, заказчыкі і арандатары бунтуюць, бо з многімі мы супрацоўнічаем ужо доўгія гады. У нас 3000 заказаў у месяц, а 30% будынка арандуюць фірмы».
ААТ «Сілуэт» — адно з найстарэйшых прадпрыемстваў бытавога абслугоўвання ў Гродне. Гісторыя прадпрыемства бярэ пачатак са жніўня 1944 г. В 1971 году для прадпрыемства ўвялі ў эксплуатацыю новы будынак Дома быта, пабудаваны на месцы старого квартала на неіснуючай сёння вуліцы Кляшторнай.
