Жыхару вуліцы Урублеўскага Святаславу надакучыла чакаць камунальныя службы і ён вырашыў сам усталяваць і адрамантаваць каля свайго пад’езда лаўкі.
«Мне надакучыла, што ў двары нічога не робіцца. Я працую ў Літве і ў мяне ёсць магчымасць зрабіць нешта добрае для прыдамавой тэрыторыі ў Гродне. Падчас адпачынку я вырашыў упарадкаваць яе: зрабіў прыемнае не толькі сабе, але і суседзям», — адзначыў гарадзенец.
Лавачкі ля пад’ездаў - «балючая» тэма для жыхароў многіх двароў у спальных раёнах горада. Іх то просяць прыбраць — каб п’яныя кампаніі не збіраліся, то, наадварот, усталяваць, каб было на чым пасядзець. У Гродне на вуліцы Урублеўскага жыве шмат пенсіянераў і амаль ля кожнага дома ёсць па некалькі лавак. Праўда, стан некаторых пакідае жадаць лепшага.
