Футбольны “Нёман” выйдзе з адпачынку 21 студзеня

Збор футбалістаў гродзенскага “Нёмана” запланаваны на 21 студзеня. Ужо вядомыя і першыя супернікі жоўта-зялёных у міжсезонні.

Не паспеюць гродзенцы выйсці з адпачынку і прайсці медкамісію, як 23 студзеня ў Гродна прыедзе брэсцкі “Рух” для першага спарынгу міжсезоння. Матч пройдзе ў футбольным манежы.

Традыцыйна ў канцы студзеня “Нёман” адправіцца ў Жодзіна і прыме ўдзел у зімовым турніры “Белазавец”. У гэтых спаборніцтвах гродзенцы згуляюць у трэці раз. У турніры прыме ўдзел чатыры каманды: “Тарпеда-БелАЗ”, “Іслач”, “Даўгаўпілс” (Латвія) і “Нёман”.

Верагодней за ўсё, уся перадсезонная падрыхтоўка ў каманды Ігара Кавалевiча пройдзе ў Гродне, як і ў мінулым годзе. Для падрыхтоўкі футбалістаў да сезону тут створаны амаль усе ўмовы.

Што да складу “Нёмана”, то за перыяд адпачынку ёсць некалькі страт. Па заканчэнні мінулага сезону стан гродзенцаў пакінуў Глеб Рассадкін і Мікалай Януш, у футбалістаў скончылася арэнда. Яўген Савасцьянаў і Аляксандр Анюкевіч перайшлі ў “Слуцк”. А ў Леаніда Ковеля і Міхайла Йаванавіча скончыліся кантракты.

Ёсць і першае набыццё – былы паўабаронца ФК “Мінск” 24-гадовы Алег Еўдакімаў 4 студзеня падпісаў кантракт з “Нёманам”, які разлічаны да канца года.

Каментары

Spelling error report

The following text will be sent to our editors: