Парку на Дзевятоўцы не будзе, будуць высоткі на краі былога балота

На месцы запланаванага парку на Дзевятоўцы збіраюцца будаваць інвестыцыйны аб’ект, а замест грамадскай забудовы «пасадзяць» 19-павярховікі. Як падкарэктавалі генеральны план Горадні, даведаўся Гродзенскі Зялёны партал.

[irp posts="90 445″ name="Зробім Генплан Гродна экафрэндлі - 1 лістапада прыходзь на абмеркаванне экалагічнага дакладу"]

У мікрараёне Дзевятоўка, дзе жыве чвэрць насельніцтва Гродна, няма ніводнага скверу. Лагічнае магчымае месца адпачынку і рэкрэацыі - вялікая пустка паміж крамай «Еўраопт» і вёскай Дзевятоўка (ад яе засталося трохі прыватных дамоў). Цяпер там расце пустазелле, кусты, садовыя дрэвы на месцы былых падворкаў. Пасярэдзіне будуецца храм Божага Нараджэння, а вакол жылыя кварталы практычна аднолькавых гмахаў.

Гараджане прапануюць захаваць зялёную тэрыторыю, уладкаваць там зону адпачынку, і напісалі пра гэта калектыўны ліст у гарвыканкам і галоўнаму архітэктару Гродна. Подпісы паставілі больш за 500 чалавек.

- Калі мы пачыналі будоўлю храма ў 2007 годзе, паводле генплана вакол яго была запраектавана паркавая зона, — расказаў ігумен храма Божага Нараджэння айцец Уладзімір Асадчы. — Галоўнае, каб астатнія хаты знеслі, расчысцілі, іншае самі зробім з добраахвотнымі памагатымі: праект, ландшафтны дызайн, пасадкі.

Паводле слоў ігумена, па перыметры ад дарогі генпланам была прадугледжана невысокая грамадская забудова. Цяпер там плануюць узводзіць 19-павярховыя жылыя дамы.

Гмахі хочуць будаваць літаральна на краі нізіны, дзе шмат гадоў было балота. Гразкая аснова можа значна павялічыць кошт квадратнага метра.

Айцец Уладзімір расказаў, што ў падмурак храма для ўстойлівасці ўбілі 200 паляў і падсыпалі зямлю. Вясковыя жыхары капалі сажалкі, каб вада не ішла ў гарод.

Цяпер няма ўжо знакамітай вёскі, дзе некалі здымалі фільм «Белыя Росы», але некалькі сажалак яшчэ засталося.

— Вось яна вада, цягнуць яе не трэба. Тут метр пракапаць і можна рабіць каскад прудоў, рыба будзе весціся. Гэта была б выдатная зона адпачынку. Пабудуюць дамы, яны залатымі стануць. Сюды, калі забудоўвалі мікрараён, ужо звозілі зямлю. Будаўнічае смецце, пліты бетонныя. Так вада лінула проста ў вёску, у гароды. Жыхары паднялі крык і эксперыменты спынілі, — расказаў старажыл мікрараёна, былы ўласкар БТ у Гродне, Януш Габінскі. — Некалі я ў гэтых сажалках лавіў ліноў па 2.7 кілаграма. А колькі раслін, птушак тут было. Зайцаў бачыў яшчэ пару гадоў таму.

Януш успамінае, што ў 70-я гады лётаў над гэтымі балотамі з меліяратарамі. Яны сцвярджалі - пад зямлёй знаходзіцца велізарнае возера.

Гісторыя з паркам паўтараецца, гадоў 15 таму на месцы былых складоў па вуліцы Пушкіна (усё той жа мікрараён Дзевятоўка), у рамках старога генплана збіраліся стварыць парк. Аднак забудавалі панэлькамі.

— Зараз дыхаць там няможна, скразныя праезды, лаўкі не паставіць, дзяцей не вывесці, а тым больш не пакінуць, — жаляцца мясцовыя жыхары. — У старых мікрараёнах хоць бы паветра ёсць, дрэвы паміж дамамі, у нас суцэльны асфальт.

У інстытуце «Гроднагрампраект» расказалі, як планавалі выправіць сітуацыю. Азначылі новае месца… вёску Дзевятоўка, пасля зносу прыватных дамоў: «Там было прадугледжана месца адпачынку для людзей, забаваў на прыродзе».

Жыхароў робіцца больш, чым прагназавалі

Паводле прагнозаў да 2030 года ў Гродне будзе жыць больш за 400 тысяч чалавек. Цікава, што да 2020 года павінна жыць звыш 340 тысяч чалавек, а паводле дадзеных на 1 студзеня 2017 — ужо зарэгістравана было звыш 340 тысяч чалавек, да канца года — звыш 360 тысяч чалавек.

Зеляніны значна менш за норму

Плошча лясных земляў у горадзе Гродна займае 10,7% ад агульнай плошчы горада, а паводле нормаў павінна займаць не менш як 15%, а на тэрыторыі грамадскай забудовы — ад 25% да 75%. У сярэднім паводле сусветных нормаў - ад 40−50%. У Мінску ровень абзелянення — звыш 22%.

Забяспечанасць насаджэннямі агульнага карыстання складае 3,2 метры квадратныя на кожнага жыхара Гродна, што складае ўсяго 21,3% ад нарматыву. Праўда, гэта лічба хоць вельмі павольна, але расце, у перыяд распрацоўкі Генплана напачатку 2000-х, паводле дадзеных зямельнага рэестра, яна складала крыху больш за 2 метры квадратныя.

Ровень забруджання паветра ў 2017 годзе, у прыватнасці, фармальдэгідам, у Гродне быў вышэй, чым у Магілёве, Віцебску і Мінску. Лесапаркавыя зоны могуць чысціць паветра ад шкодных рэчываў да 70%.