Увечары 27 кастрычніка ў “Цэнтры гарадскога жыцця” пройдзе міжнародная танцавальная сустрэча “Дзень і ноч танцаў”. Напярэдадні маштабнага мерапрыемства музыканты і танцоры з літоўскай Клайпеды зладзілі ў цэнтры Гродна невялікі канцэрт і прымусілі гараджан танцаваць.
Музыкі з Клайпеды адзначаюць, што часта граюць у гарадах Еўропы. У Гродне яны ўпершыню і атмасфера гэтага горада ім спадабалася.
«Калегі з Гродна запрасілі на «Дзень і ноч танцаў», – распавядае Рыта Шукеня – Калі мы недзе бываем, мы стараемся выходзіць у цэнтр горада і граць. У Гродне добрая атмасфера, людзі спыняліся і танцавалі з намі, і нават капейкай аддзячылі музыкам. Мы не толькі сваё гралі, але і беларускае, бо культура і гісторыя нашых народаў практычна адна».
На “Дзень і ноч танцаў” у “Цэнтры гарадскога жыцця” чакаецца каля дваццаці літоўцаў, акрамя іх будуць беларусы з розных гарадоў і прадстаўнікі іншых суседніх краін. Пачатак мерапрыемства ў 20:00.
