Пашырэнне дарогі па вуліцы Дзяржынскага ў Гродне дазволіла вусным распараджэннем кіроўцаў каля ААТ «Гроднатэамантаж» спілаваць два «непажаданых» дрэва, а потым і яшчэ два.
У таксацыённым плане дрэвы, якія вырашылі выдаліць, пазначаныя перакрэсліваннем і далей ідзе расшыфроўка, што гэта было за дрэва. Актывістаў Зялёнага дазору зацікавіла правамернасць выдалення незапланаваных чатырох дрэў каля аўтастаянкі ААТ «Гроднатэамантаж».
Як патлумачыў адзін з кіраўнікоў прадпрыемства, прыехалі працаўнікі «Гродназелянбуд» і спыталі, якія дрэвы пілаваць. Вусным распараджэннем было ўказана на дзве бярозы каля аўтастаянкі, якія былі няўгодныя аўтамабілістам.
Каардынатар Зялёнага дазору ў Гродне Яўген Філімонаў у дзень спілоўкі дрэў прасіў паказаць дакументы. «Гродназелянбуд» праігнараваў. Па плане дарожных работ гэтыя дрэвы не пазначаныя як кандыдаты на выдаленне.
Паміж дрэваў дарожныя службы капаюць траншэі пад чатырохметровыя азбеставыя трубы. На вусную просьбу актывістаў у выпадку выяўлення каранёў ня секчы іх, а обкапывать, як камунікацыі, работнікі толькі ўсміхаюцца: «Трубы обкапываем, таму што кранеш — будзе смярдзець, а карані, што з іх».
На тэрыторыі РУП «Фармацыя» па вуліцы Дзяржынскага кожнае дрэва мае інвентарны нумар. На адно з іх нанеслі «чорную пазнаку» выдалення, у плане тут павінна праходзіць электрычная сетка.
Дарэчы, траншэі пад гнуткія кабелі можна капаць з выгібамі і дрэва можна не секчы.