Звычайна дзіцячыя прадстаўленні лялечнікі ладзяць для дзяцей ўзросту 3+. А ў Гродне вырашылі запрасіць у тэатр яшчэ малодшых гледачоў. Зараз у тэатры лялек рыхтуюць навагоднюю бэбі-пастаноўку. Рэжысёрам спектакля будзе Алег Жужжда, а лялек прыдумае мастачка Ларыса Мікіна-Прабадзяк.
Каб не напалохаць яшчэ «маладога і нявопытнага» тэатрала вялікай залай, гучнай музыкай і прыцемненай сцэнай, спектаклі будуць праходзіць у музеі тэатра. На кожны паказ плануюць запрасіць па 20 дзяцей разам з бацькамі.
Каб не стаміць малых тэатралаў, спектакль будзе разлічаны на кароткі час. Нават героі прыдуманага для малышоў спектакля будуць невялікімі. Іх чакае п’еса «Маленькі Дзед Мароз».
