Вечарам 24 верасня ўдзельнікі новага сезону моўных курсаў знаёміліся, слухалі гарадскія легенды, расказвалі, як правялі лета і запрашалі на ўласныя ініцыятывы. Гэта ўжо чацвёрты сезон бясплатных курсаў беларускай мовы, які збірае штопанядзелка дзесяткі гродзенцаў.
Сустрэча ў «Цэнтры гарадскога жыцця» распачалася са знаёмства, бо некаторыя наведвальнікі прыйшлі на курсы ўпершыню. Кожны называў сваё імя і адказваў на зададзенае пытанне. Аказваецца, гродзенцы любяць чытаць Караткевіча, Геніюш, Карпюка і Брэдберы. Іх любімыя месцы ў горадзе — Каложа, назіральныя пляцоўкі і «Цэнтр гарадскога жыцця». А ідэальны дзень- калі яны могуць паразмаўляць на беларускай мове.
Госцем стаў містычны гродзенскі гісторык Андрэй Павач. Пад гэтым імем хаваюцца два Андрэі - Вашкевіч і Чарнякевіч. Разам з выдаўцом Аляксандрам Рыжым яны прэзентавалі кнігу «Легенды (не)старой Гародні», якую можна набыць у «Цэнтры гарадскога жыцця». Навучэнцы і гісторыкі паўзгадвалі легенды і міфы горада, якія кожны расказваў па-свойму.
— Калі вы не можаце нешта зразумець з вашага атачэння, нейкія рэчы вам падаюцца дзіўнымі, вы спрабуеце іх па-свойму патлумачыць. Калі папярэднія пакаленні знікаюць, не пакінуўшы тлумачэнняў, выбіраюцца іншыя — зразумелыя і блізкія, — тлумачаць гісторыкі.
Напрыканцы занятку гродзенцам прапанавалі стварыць свае міфы пра скульптуру турыста, якая нядаўна паўстала на Савецкай. Найбольш усім падабаўся міф, што турыст доўга шукаў прыбіральню на Савецкай плошчы, не знайшоў і застыў у такой вось дзіўнай позе.
Заняткі курсаў Мова нанова будуць праходзіць штопанядзелка ў «Цэнтры гарадскога жыцця». На наступны занятак па тэме мапаў і картаграфіі завітае Hrodna.life.
