Ужо сёння 6 верасня гродзенскі «Нёман» правядзе трэці матч сёлятнега розыгрышу Лігі чэмпіёнаў і ў чэшскім Брно сустрэнецца з мясцовай «Каметай». Напярэдадні матчу Hrodna.life распавядае пра фан-амбасадора гродзенскай каманды.
Прадстаўніком"Нёмана" ў Лізе чэмпіёнаў у гэтым годзе абраная Наталля Бурдун, якая на працягу трох гадоў актыўна падтрымлівае чырвона-чорных.
Калі ў мінулым годзе Ліга чэмпіёнаў выбірала двух прадстаўнікоў ад каманд, то ў гэтым годзе толькі аднаго. Пры гэтым прадстаўнікі турніру правялі пільны адбор удзельнікаў, былі абраныя лепшыя людзі.
Новы вопыт
Быць фан-амбасадарам у Лізе Чэмпіёнаў гэта магчымасць паглядзець на хакей і гульцоў іншымі вачыма, бо ў прадстаўнікоў гарадоў ёсць магчымасць здзейсніць «тур за кулісы матча» і пагутарыць з лепшымі гульцамі сустрэч. Акрамя гэтага, задача ў фан-амбасадара няпростая — ён павінен наведаць усе матчы сваёй каманды ў ЛЧ на хатняй арэне і пры гэтым рабіць фота і відэа справаздачы ў сацыяльных сетках.
«У мяне ўсё пачалося пасля таго, калі я ўбачыла навіну пра тое, што ёсць магчымасць стаць фан-амбасадарам ад „Нёмана“, — распавядае Наталля. — Было вельмі цікава, гэта меў быць новы вопыт для мяне, выклік сабе, каб успомніць англійскую мову. Бо ўсе навіны з матчаў амбасадары павінны публікаваць на англійскай мове».
https://www.instagram.com/p/BnKJp4gjmlK/?taken-by=pivonya
Не ўсе заданні атрымліваюцца
У выніку Наталля адправіла сваю заяўку і прымацавала відэа. У пачатку жніўня дзяўчыне прыйшоў ліст, што яна абраная прадстаўніком «Нёмана». Усяго ж Ліга чэмпіёнаў абрала 32 амбасадары ад каманд. Усе гэтыя людзі атрымалі адмысловыя майкі і квіткі на хатнія гульні сваёй каманды ў Лізе чэмпіёнаў.
«Адказ ад прадстаўнікоў турніру чакала каля месяца, — кажа Наталля. — Была вельмі рада станоўчаму выніку, і разумела што перада мной цяпер стаіць адказная задача. Вельмі хвалявалася. С пачаткам турніру перад кожным матчам прадстаўнікам каманд даецца якое-небудзь заданне, якое трэба выканаць. Усе хто выконвае заданні зможа пасля прыняць удзел у розыгрышы бясплатных квіткоў на фінал Лігі чэмпіёнаў. Я стараюся выконваць заданні, але не заўсёды ўсё атрымліваецца. Напрыклад, мне трэба было сфатаграфавацца з фанатамі чэшскай „Каметы“ ў Гродне, але калі я да іх пайшла, яны сказалі ніякіх фатаграфій. Спасылаліся на тое, што „Нёман“ гэта іх ворагі і ніхто фатаграфавацца не будзе. Я ўгаворвала, але яны адмовіліся».
Нягледзячы на невыкананне аднаго з заданняў, дзяўчына не кінула працу фан-амбасадара, а наадварот яшчэ больш актыўна пачала дзейнічаць. Гэта было бачна на матчы з швейцарскім «Цугам».
https://www.instagram.com/p/BnOd4lYDjEl/?taken-by=pivonya
«Нёман» ужо як сям’я
Наталля заўзее за «Нёман» з 2016 года. У тым годзе яна выпадкова ў сталіцы трапіла на матч «Нёмана» з «Юнацтвам». Гульня гродзенцаў яе моцна зачапіла. Гэта быў першы хакейны матч для дзяўчыны i пасля гэтага яна пачала ўважліва сачыць за гродзенцамі.
«Я жыву ў Мінску і стараюся заўсёды наведваць матчы „Нёмана“ ў сталіцы. З мінулага сезону пачала старацца таксама выязджаць. Нават прыезд у Гродна для мяне лічыцца выездам. Сёння „Нёман“ для мяне ўжо як сям’я, у нейкім сэнсе гэта каханне, таму што тыя эмоцыі і пачуцці, якія адчуваеш на гульні, вельмі каштоўныя. Атмасфера на матчах гродзенцаў заўсёды станоўчая. Нават мае сябры да маёй любові да „Нёмана“ ставяцца станоўча, яны рады за мяне».
Нейкага гульца ў «Нёмане» Наталля выдзяляць не хоча, у яе ўсе любімыя. З 2016 года Наталля прысвяціла гродзенскаму клубу ўжо каля дваццаці твораў. Адзін з апошніх пра легенду гродзенскай каманды Вячаслава Лісічкіна.
«Калі Слава сыходзіў, я напісала верш і апублікавала яго. А Слава забраў яго да сябе ў iнстаграм. Ён можа і не ведаў хто пісаў, але мне было прыемна, што мой верш дайшоў да адрасата. Стала прыемна».
У гэтым годзе на рахунку Наталлі ўжо два дамашнія матчы «Нёмана» ў Лізе чэмпіёнаў. 6 верасня дзяўчына плануе быць у чэшскім Брно і там падтрымліваць любімы «Нёман».
