«Суседзі-2018» пройдуць ужо 21 ліпеня. Як за два тыдні падрыхтавацца да марафону?

Веласіпедны марафон «Суседзi 2018» адбудзецца 21 ліпеня ля Аўгустоўскага каналу. Як падрыхтавацца, калі да старту засталося крыху больш за два тыдні? Якую стратэгію абраць, каб паспяхова дайсці да фінішу? Пра гэта Hrodna.life распавялі каардынатар каманды «ВелаГродна» Аляксандр і адна з дзвюх дзяўчат у камандзе Алеся.

Не толькі ногі, але і «пятая кропка»

Тым, хто далёкі ад звання прафесійнага раварыста і карыстаецца веласіпедам толькі некалькі разоў на месяц, Аляксандр раіць не фарсіраваць падрыхтоўку. «Проста рэгулярна ездзіць на ровары спачатку на невялікія адлегласці. Пачаць з 10 км, паўтарыць дыстанцыю цягам двух-трох дзён. Потым паступова павялічваць на 5 км».

Аляксандр адзначае, што да такіх прабегаў павінны прызвычаіцца не толькі ногі, але і «пятая кропка»: «Трэба ўсё рабіць плаўна, не накручваць адразу 50- 70 км». А вось ужо за пяць дзён да самога марафону Аляксандр раіць паспрабаваць дзве-тры паездзкі ў інтэнсіўным тэмпе.

«За два тыдні выйсці на ўзровень спартсмена немагчыма. Ад удзелу ў першую чаргу трэба атрымаць задавальненне, ды каб пасля марафону не знікла жаданне ездзіць на ровары».

[irp posts="28 080″ name="707 раварыстаў сабраў VII міжнародны веламарафон «Суседзі""]

Не выкладвацца з першых кіламетраў

Алеся адзначае, што важна быць гатовым не толькі фізічна, але і маральна: «Трэба проста хацець ехаць і дасягнуць сваёй мэты — даехаць да фінішу».

Сама Алеся ўжо не першы год прымае ўдзел у падобных заездах і дзеліцца з чытачамі Hrodna.life сваімі сакрэтамі.

1. Не пачынаць выкладвацца напоўніцу з першых кіламетраў
2. Пачынаць напружвацца на апошняй дзясятцы
3. Аддаваць усе сілы на апошніх 3−5 км
4. Мець з сабой чым падсілкавацца: батончыкі або бананы

Жанчыны пераадольваюць паўмарафон — каля 40 км — за паўтары-дзве гадзіны. Летась Алеся праехала яго за 1г42хв.

А вось стратэгія Алесі для падрыхтоўкі навічкоў кардынальна адрозніваецца ад парад Аляксандра.

Аматарам Леся раіць раз на тры дні ў спакойным тэмпе праязджаць дыстанцыю роўную дыстанцыі паўмарафону ці нават крыху больш. Дзень ездзіш у рытме, два адпачываеш.

Марафон для ўсіх узростаў

У марафоне «Суседзі» прымаюць удзел не толькі грамадзяне Беларусі. Традыцыйна чакаецца шмат удзельнікаў з Польшчы і Літвы. Аднойчы ў «Суседзях» удзельнічаў нават госць з Новай Зеландыі!

Узрост удзельнікаў - ад двух год, прычым для дзетак прадугледжаны асобныя маленькія дыстанцыі, напрыклад 100 метраў. Узроставых абмежавання няма. З Літвы нярэдка прыязджаюць удзельнікі старэйшыя за 80 год. Самыя вынослівыя праязджаюць нават 65 км.

Запісацца і атрымаць больш падрабязную інфармацыю можна на сайце velogrodno.by.