Дом афіцэраў у Гродне не змаглі прадаць 14 разоў: што адпужвае інвестараў?

Дом афіцэраў пасля 14 аўкцыёнаў дагэтуль застаецца без новага ўласніка. Не дапамагае ў пошуках пакупніка і зніжаная на 80% першапачатковая цана. А тым часам будынак працягвае разбурацца — цячэ дах, на сырых сценах абвальваецца тынкоўка. «ВГ» разабраўся, што адпужвае патэнцыйных інвестараў - завышаная цана, жорсткія ўмовы продажу або статус гістарычнай каштоўнасці?

Апошні афіцэр з Дому афіцэраў

На цэнтральных шкляных дзвярах будынка вісіць паперка: «Уваход толькі праз начны клуб „Эпалет“». Дзверы знутры забітыя. За шклом бачны банер некалі папулярнай гродзенскай дыскатэкі «Камелот».

Трапіць у Дом афіцэраў можна толькі з боку вуліцы Ажэшкі - праз стары корпус 1935 года дзе дагэтуль працуе начны клуб. На ўваходзе нас сустракае вахцёр. Прайсці ў зачыненую частку будынка нельга. Але за шклянымі дзвярыма паміж старым і новым карпусамі на падлозе фае бачныя старыя плакаты і вялізная чырвоная зорка. У іншых месцах раскіданыя дошкі, у кутах сабрана абваленая тынкоўка, дзе-нідзе зняты паркет. Сцены ад вільгаці сталі карычнева-шэрымі.

Нягледзячы на тое, што Дом афіцэраў знаходзіцца ў жаласным стане, ён не пустуе. Акрамя начнога клуба тут ёсць офіс ваенна-паляўнічага аб’яднання, працуюць цырульня, майстэрня па рамонце прадметаў побыту. Яе ўладальнік Юрый Юр’еў - самы «стары» арандатар, у «афіцэрцы» з 90-х гадоў.

— Калісьці тут было 50 арандатараў. Цяпер нас па пальцах адной рукі можна пералічыць. Асабіста я не збіраюся адсюль сыходзіць. Мне 74 гады, шукаць новае месца для майстэрні ў мяне не хопіць сіл, — прызнаецца Юрый, афіцэр ПДВ у адстаўцы, і жартуе: у Доме афіцэраў ён апошні афіцэр.

Паводле яго слоў, у тым, якім стаў будынак, вінаваты неэфектыўны менеджмент.

— Знік дыхтоўны стары паркет, невядома куды зніклі раялі. Іх так і не знайшлі. У будынку цячэ дах, ліўнёвка ў сцяне працякае. Патрэбен гаспадар, які навядзе парадак, — лічыць ён.

Будынак ратуюць з дапамогай «касметыкі»

Сёння Дом афіцэраў знаходзіцца на балансе гарадскога цэнтра культуры. У будынку кругласутачна дзяжурыць вахцёр, ёсць нават прыбіральшчыца.

З-за даху, які працякае, новы корпус зачынілі ў 2014 годзе. Падчас яго будаўніцтва ў 1973 годзе былі няправільна выкладзеныя панэльныя пліты, і ўнутр стала трапляць вада. Дзіркі ў даху спрабавалі залатаць, але яна зноў працякла. Зараз, каб знайсці крыніцу цечы, трэба ўскрываць увесь дах, тлумачыць намеснік дырэктара ГУ «Гродзенскі гарадскі цэнтр культуры» па адміністрацыйна-гаспадарчай частцы Сяргей Паповіч.

Каб будынак не руйнаваўся, перыядычна праводзяць касметычны рамонт. Узімку пустыя памяшканні пратапліваюць.

Дарэчы, ў 2014 годзе працякаў дах і ў старым корпусе Дома афіцэраў. Падрамантавалі - дах не працякае, і гэтая частка будынка захавалася.

Новы корпус танней знесці, чым рамантаваць

За два з паловай гады — менавіта столькі спрабуюць прадаць Дом афіцэраў - патэнцыйныя інвестары будынкам не зацікавіліся. На думку намесніка старшыні Гродзенскага гарвыканкама Андрэя Болтрыка, адпужвае акурат стан новага корпуса. Нягледзячы на тое, што ён моцна разбураны, да гэтага часу не прызнаны аварыйным. Новы корпус не з’яўляецца гісторыка-культурнай каштоўнасцю, і без яго Дом афіцэраў мае значна больш шанцаў знайсці новага гаспадара.

— Па даручэнні губернатара вобласці ў бліжэйшы час будзе праведзена экспертыза будынка на прадмет аварыйнасці. Калі апынецца, што новы корпус танней знесці, чым адрамантаваць, яго знясуць. Гістарычны будынак без прыбудовы будзе выглядаць больш прывабным для бізнесу. Вызваленую зону можна выкарыстоўваць як паркоўку, — распавёў Андрэй Болтрык.

Любыя працы прыйдзецца ўзгадніць з Мінкультуры

Яшчэ адна прычына няўдалых продажаў - тая частка Дома афіцэраў, якая прызнана гісторыка-культурнай каштоўнасцю. Гэта значыць, што новаму гаспадару усе свае дзеянні, ад праекта да здачы аб’екта ў эксплуатацыю, трэба ўзгадняць у інстанцыях, у тым ліку з упраўленнем архітэктуры і будаўніцтва гарвыканкама, Мінкультуры і Дзяржбудэкспертызай.

Акрамя таго, паводле Указу № 557 пры вядзенні прадпрымальніцкай дзейнасці ў аб’екце гісторыка-культурнай каштоўнасці бізнесмэн абавязаны адлічваць 5% ад прыбытку, а замежны — 25%.

Гісторыя

«Dom Strzelca» ў стылі польскага канструктывізму пабудавалі ў 1935 годзе. У верасні 1939 года ад савецкіх войскаў тут абараняліся вучні польскіх гімназій, некаторыя з іх пазней былі расстраляныя.

У 1965 годзе было прынята рашэнне аб зносе некаторых будынкаў у акрузе і прыбудове да Дому афіцэраў канцэртнай залы на 800 чалавек. Яе ўзвялі ў 1973 годзе. Доўгі час яна была галоўнай канцэртнай пляцоўкай Гродна з самай вялікай сцэнай у горадзе.

Даведка

Упершыню будынак на вуліцы Ажэшкі, 30 выставілі на таргі ў лістападзе 2016 года. Пачатковая цана — 5,15 млн дэнамінаваных рублёў. Праз год цану знізілі на 80 працэнтаў, да 1,26 млн рублёў. Але нават за такія грошы не знайшлося інвестараў. Па ўмовах таргоў,
новы ўласнік абавязаны правесці капітальны рамонт або рэканструкцыю будынка і ўвесці яго ў эксплуатацыю на працягу чатырох гадоў з моманту падпісання дамовы куплі-продажу. Рэканструяваць можна пад аб’ект грамадска-дзелавога прызначэння — забаўляльны цэнтр, рэстаран, гандлёвыя плошчы і іншае.