У рэдакцыю «Лiдскай газеты» прыйшоў ліст ад жыхароў Ліды Яраслава і Васілісы Пазнуховых, у якім чытачы абураюцца зместам рэкламы «Лідскага піва». Рэдакцыя атрымала адказ на абурэнне і ад піўзавода.
Гэтак выглядае рэкламны плакат:
Тэкст слогана моцна абурыў лідскую сям’ю, якая палічыла гэта неэтычным піярам. Ніжэй прыводзім вытрымкі з ліста, увесь тэкст можна прачытаць на сайце «Лідскай газеты»:
«Кожная баханка хлеба — трагічная гісторыя зерня, якое магло б стаць півам, але не стала», — так даслоўна абвяшчае гэты надпіс. На нашу думку, гэта выказванне проста абразліва ў гістарычным і маральным сэнсах для славянскіх народаў.
З гісторыі мы ведаем пра трагедыю Паволжа 1920−23 гадоў, калі ад недахопу хлеба памерла каля пяці мільёнаў чалавек, гэта паўтарылася ў 1932−33 гадах і забрала жыцці яшчэ ад двух да васьмі мільёнаў. За час блакады Ленінграда ад голаду загінула, паводле афіцыйных дадзеных, 641 тысяч гараджан".
«Яшчэ адну прыказку хочацца вылучыць асобна: «Хлеб на ногі ставіць, а віно валіць». Пра што яна нам кажа? Правільна, пра здаровы лад жыцця, неабходнасць якога разумелі нашы продкі. Сёння размова пра ЗЛЖ стала модным трэндам, але чаму навучыць падобная рэклама падрастаючае пакаленне? Таму, што ёсць хлеб — гэта трагедыя, бо можна замест гэтага выпіць піва?! А на думку спецыялістаў, зерне і цэльназернавыя прадукты — галоўныя крыніцы прыродных макра- і мікраэлементаў, цэльназернавыя (нерафінаваныя) мука і хлеб з мукі грубага памолу дазваляюць падтрымліваць неабходны баланс мінеральных рэчываў!
Мы не супраць існавання піва, не супраць таго, каб дарослыя людзі разумна і дазавана яго ўжывалі. Лідскі піўзавод — адно з найстарэйшых і самых годных прадпрыемстваў нашага горада, нездарма Дзень горада і фестываль хмеля, соладу і вады адзначаюцца лідчанамі адначасова. Але не ўсе сродкі добрыя для рэкламы. Паставіўшы на адну чашу вагаў бохан хлеба, а на другую — бутэльку піва, вы прыраўнялі па значнасці тое, што немагчыма параўноўваць".
Зварот лідчан рэдакцыя пераадрасавала генеральнаму дырэктару ААТ «Лідскае піва» Аўдрыусу Мікшысу, і вось які з гэтай нагоды атрымала каментар:
«ААТ"Лідскае піва"разгледзела накіраваны Вамі ліст ад жыхароў горада Ліды аб рэкламе піва «КОRONEТ» з выкарыстаннем надпіса «Кожная баханка хлеба — трагічная гісторыя зерня, якое магло б стаць півам, але не стала» і паведамляе наступнае:
Пазначаны надпіс з’яўляецца рэкламай. Згодна з Законам Рэспублікі Беларусь ад 10 мая 2007 г. № 225−3 «Аб рэкламе» (далей — Закон), рэкламай будуць з’яўляцца слоганы, тэксты пра гісторыю вытворцы або прадукта, малюнкі медалёў, атрыманых вытворцам на конкурсах або выставах, вершы, жарты (анекдоты), змест якіх эмацыйна «падтрымлівае» тавар, і інш.
Уся рэкламная інфармацыя, якая размяшчаецца на этыкетках (упакоўцы) тавару, вырабленага ААТ «Лідскае піва», адпавядае патрабаванням Закона, у т. л. выконваецца патрабаванне аб нанясенні папераджальнага надпіса пра шкоду празмернага ўжывання піва з разлікам 10% плошчы рэкламы, якую такі надпіс павінен займаць.
Сапраўдны адказ на зварот можа быць абскарджаны ў судзе ў парадку, устаноўленым заканадаўствам".
