На будпляцоўцы «Трыніці» працуюць пашукавікі. Знайшлі яшчэ штык-нож, медальён і гадзіннік

Ужо сёння па знойдзеных на будпляцоўцы ГЗК «Трыніці» рэчах можна меркаваць, што там знаходзіцца групавое пахаванне савецкіх салдат часоў Другой сусветнай вайны. З 14 лютага на пляцоўцы працуюць пашукавікі 52-га асобнага спецыялізаванага пошукавага батальёна, якія выявілі ў зямлі новыя знаходкі.

11 лютага падчас правядзення земляных работ былі знойдзены астанкі, як мяркуецца, трох салдат, якія загінулі падчас Другой сусветнай вайны. Разам з парэшткамі былі знойдзеныя і некаторыя асабістыя рэчы.

На 15 лютага пашукавікі паведамляюць пра наступныя знаходках: два медальёны, кішэнны гадзіннік, штык-нож, кацялок, лыжка, процігаз, каска, патроны рознага калібра, падэшва ботаў і элементы зброі. Частка знаходак цяпер у следчым камітэце. Плануецца, што знойдзеныя медальёны салдат будуць перададзеныя ва Упраўленне па ўвекавечанню памяці абаронцаў Айчыны і ахвяр войнаў для правядзення экспертызы і ідэнтыфікацыі вайскоўцаў.

Па сённяшніх знаходках можна казаць, што былі знойдзеныя парэшткі савецкіх салдат, якія загінулі ў чэрвені 1941 года на подступах да Гродна. Пра гэта сведчаць абломкі СВТ-40 і медальён «смяротнік». Такія медальёны выдавалі вайскоўцам 85-й дывізіі за 10 дзён да вайны СССР з Германіяй, а восенню 1941 іх адмянілі.

Пашукавікі будуць працаваць на будпляцоўцы яшчэ некалькі дзён. Ёсць вялікая верагоднасць знайсці яшчэ рэшткі загінулых салдат. Варта адзначыць, што ў 2014 годзе пошукавы батальён недалёка ад цяперашняга месца ўжо праводзіў раскопкі: тады былі знойдзеныя групавыя баявыя пахавання.