На месцы графіці з чаўном у пераходзе каля аўтавакзала з’явілася маштабная карціна чырвоным колерам. Так незвычайна гродзенцаў павіншавалі з новым годам. Малюнак трывае ўжо каля двух тыдняў.
«Падпісалі „антыстыль“, каб ніхто нічога іншага не падумаў»
Што менавіта адлюстраваў невядомы аўтар, адразу зразумець цяжка. Карціну дапаўняюць надпісы: «З новым годам 2018», «Антыстыль», «Андэграўнд Family», «1206».
Журналістка Ірына Чарняўка, якая скончыла мастацкую школу і цікавіцца мастацтвам, падзялілася думкамі наконт твора ў пераходзе. На яе думку, гэта — інтэлектуальнае, канцэптуальнае графіці, даволі цэльны, невыпадковы зварот. Ён мае інфанагоду, змест, формы і нават пазначаныя крыніцы.
— Аўтары падпісалі, што гэта антыстыль, каб ніхто нічога іншага не падумаў. Гэта падлеткавая дэталь. І яно так і ёсць. Антыстыль — адмыслова няўмелы і пачварны кірунак у мастацтве, пазбаўлены «прыгажосці». Адэпты антыстылю супрацьпастаўляюць свае творы камерцыйнаму графіці.
Надпіс, а не малюнак
На думку Ірыны Чарняўка, гэта хутчэй не малюнак, а надпіс. Райтэры спрабавалі напісаць літары нейкай фактурай. Аднак, што менавіта напісана, пакуль незразумела. Магчыма, першая літара — «ц».
Надпіс «З новым годам», верагодна, паводле Ірыны, адлюстроўвае інфанагоду і змест. Справа зверху подпіс аўтара. Справа знізу можа быць спасылка на знакавы амерыканскі дакументальны фільм 2008 года «Family Underground». Што значаць лічбы «1206», застаецца толькі здагадвацца. Магчыма, гэта дзень народзінаў аўтара (12 чэрвеня) — дзень, калі пачынаецца яго ўласны новы год.
— О, ведаю, — раптам кажа Ірына падчас разважанняў над карцінай. — Гэта ж печань! Цырозная печань і, магчыма, кішкі. Так што гэта гумар. Якія малайцы!
Ірына мяркуе, што варта фатаграфаваць графіці, нават калі яны падаюцца простымі або непрыгожымі: «Часам можна трапіць на цэлыя графічныя маніфесты і цікавых аўтараў».
Крэатывілі ноччу
Цётка Валя, якая часта сядзіць у пераходзе, распавяла, што графіці з’явілася не больш за два тыдні таму, на пачатку года.
— Я сыйшла ўвечары, гэтага (графіці — заўв. «HL») не было. Прыйшла ранкам — ужо намалявалі. Хто, я не ведаю. Ранкам музыканты прыйшлі, што звычана тут граюць. Яны таксама здзівіліся, што нехта намаляваў, — распавядае жанчына.
Дарэчы, з праекта трохгадовай даўніны, які падарыў Гродна каля дзясятка графіці на дамах і трансфарматарных будках, непашкоджанымі і незамаляванымі засталіся, бадай што, толькі два: алень святога Губерта на праспекце Янкі Купалы і чалавек, які ляціць у неба, на Дзевятоўцы.
