Паведамленні аб зніклых хатніх жывёлах, якія ў навагоднюю ноч спалохаліся выбуху салютаў, працягваюць з’яўляцца ў сацыяльных сетках дагэтуль. Гродзенцаў папярэджвалі, што браць сваіх сабак на салют не варта, але некаторыя вырашылі рызыкнуць. Як аказалася — дарма.
Колькасць зніклых і знойдзеных у першыя дні студзеня сабак застаецца высокай, як і летась. Лідзіруюць ёркшырскiя тэр’еры, якіх знаходзяць у розных раёнах горада.
«Акрамя безадказнасці гаспадароў прычын не бачу. Колькі не размяшчалі пасты аб тым, каб у навагоднюю ноч людзі не бралі з сабой хатніх жывёл, яны ўсё роўна працягваюць гэта рабіць, — распавядае старшыня арганізацыі «Адданае сэрца» Алена Шыманiца. — Хатнія сабакі ўцякаюць, бо для іх раптоўны гук гэта шумавы стрэс. Трэба ўлічваць, што слых у іх значна вастрэйшы, чым чалавечы. Ніколі не зразумею, навошта браць сабаку ў стрэсавую сітуацыю ў чужое месца.
Так губляюцца найчасцей малыя сабакi, якіх людзі нясуць у руках. У гэтым годзе нашэсце па страце ёркшырскіх тэр’ераў. Пры выбуху петарды сабака проста саскоквае з рук і ўцякае у любы бок. Але бывае, што і вялікія жывёлы знiкаюць, часцей з двара, бо побач выбухі. Сабака шукае месца каб схавацца. Пасля заканчэння кананады сабакам яшчэ мінімум гадзіну трэба каб прыйсці ў сябе. Але не кожная знойдзе дарогу назад".
Як шукаць сабаку, які ўцёк у навагоднюю ноч?
Валанцёры «Адданага сэрца» яшчэ год таму падрыхтавалi падрабязную інструкцыю для гаспадароў, якія шукаюць сваіх зніклых гадаванцаў.
1. Калі сабака быў пародзісты, то перш за ўсё патэлефануйце заводчыку і ў арганізацыю, дзе ён быў зарэгістраваны.
2. Надрукуйце пабольш аб’яў і флаераў.
3. У аб’яве падрабязна апішыце сабаку, абавязкова прыкладайце фатаграфію і не забудзьцеся напісаць, што гарантуецца ўзнагароджанне. Аб’явы неабходна расклеіць:
• на бліжэйшых пад’ездах
• прыпынках
• крамах
• аўтазаправачных станцыях
• школах, дзіцячых садках, спартзалах, каля паліклінікі
4. Аб’явы часта зрываюць, таму расклейваць іх неабходна штодня. Флаеры можна раздаць людзям, якія выгульваюць сваіх сабак, не палянуйцеся схадзіць на бліжэйшыя сабачыя пляцоўкі і месцы выгулу сабак. Вельмі дапамагаюць у пошуку сабак школьнікі. Можна схадзіць у бліжэйшыя школы і папрасіць паглядзець сабаку, раздаўшы дзецям флаеры. Звычайна дзеткі з радасцю згаджаюцца і вельмі ўзмоцнена шукаюць, бо так можна зарабіць грошы. Абавязкова падыдзіце да дворнікаў, суседзяў і абавязкова да бабуль, якія сядзяць ля пад’езду. Чым больш людзей будзе ведаць, што згубіўся сабака, тым лепш.
5. Абыдзіце ўсе заакрамы і ветэрынарныя клінікі ў вашым раёне, таксама ўсе буйныя клінікі і заакрамы ў вашым горадзе. Часта людзі, якія падбіраюць сабаку на вуліцы, звяртаюцца за дапамогай у ветэрынарныя клінікі ці проста могуць прыйсці ў краму за пакупкамі. Пакіньце інфармацыю ветэрынарным лекарам і прадаўцам гэтых магазінаў, абавязкова наляпіце аб’явы.
6. Звярніцеся ў САХ.
7. Дайце аб’яву ў газеты, на радыё і тэлебачанне.
8. Абавязкова дайце аб’яву ў інтэрнэце.
9. Патэлефануйце ў прытулак і пакіньце інфармацыю пра вашага сабаку.
10. Некалькі разоў у дзень абыходзіце тыя месцы, дзе вы часцей за ўсё гулялі са сваім гадаванцам.