Спартыўную драму пра легендарны матч паміж зборнымі Савецкага Саюза і ЗША пакажуць у кінатэатрах «Кастрычнік» і «Космас», паведамляецца на сайце «Гроднааблкінавідэапраката». Прэм’ера стужкі расійскага кінематографа «Рух уверх» адбудзецца ўжо сёння.
Заснаваная на рэальных падзеях, карціна прысвечана перамозе баскетбольнай зборнай СССР на Алімпійскіх гульнях 1972 годзе ў Мюнхене. Фінальны матч паміж зборнымі дзвюх краін назаўсёды ўвайшоў у гісторыю сусветнага баскетбола. Да канца паядынку заставаліся 3 секунды, амерыканцы выйгравалі 50:49. Іван Едэшка пасылае праз усю пляцоўку мяч Аляксандру Бялову, і той закідвае яго ў кола. Зборная Савецкага Саюза становіцца чэмпіёнам Алімпіяды, пасунуўшы з вышэйшай прыступкі п’едэстала амерыканскіх баскетбалістаў, якія не саступалі гэтую пазіцыю на працягу 36 гадоў.
Наш зямляк заслужаны майстар спорту СССР, алімпійскі чэмпіён Іван Едэшка выступіў кансультантам фільма. Ён падказваў акцёрам, у прыватнасці Уладзіміру Машкову, выканаўцу ролі трэнера савецкай зборнай Кандрашына, як той заўзеў за сваю каманду.
Дарэчы, яго ўнучаты пляменнік Уладыслаў Едэшка таксама дасягнуў высокіх поспехаў у спорце, сёння ён трэнер у «Байцоўскім клубе».
А ўчора Іван Едэшка даў майстар-клас баскетбалістам юніёрскай зборнай Беларусі, піша Белта.
Падчас сустрэчы ў Мінску ён распавёў, што да 14 гадоў пераспрабаваў амаль усе спартыўныя секцыі, што былі ў Гродне, а потым цалкам сышоў у баскетбол, які стаў справай усяго яго жыцця. Нягледзячы на тое, што ўвесь свет лічыць пікам кар’еры Івана Едэшка яго «залаты пас» ў фінале мюнхенскай Алімпіяды, сам ён сказаў, што вельмі шануе і званне чэмпіёна БССР, якое заваяваў у маладым узросце ў складзе каманды Гродзенскай вобласці.
