Танцавальны марафон чакае наведвальнікаў экспазіцыі гісторыі танца Гродзеншчыны. Госці не толькі ўбачаць, што, як і ў якіх строях танцавалі гродзенцы і жыхары рэгіёна, пачынаючы з эпохі сярэднявечча і заканчваючы цяперашнім часам, але і вывучаць на майстар-класах некалькі простых танцавальных рухаў, піша «Гродзенская праўда».
На выставе, якая размесціцца ў адной з залаў Цэнтра спадчыны Гродзенскага гарадскога цэнтра культуры, будуць прадстаўлены рэплікі касцюмаў XVII — XIX стагоддзяў, арыгінальныя танцавальныя камплекты, створаныя ў XX стагоддзі, аксесуары, фатаграфіі, спецыяльная літаратура і сувеніры на танцавальную тэматыку.
— З XVII стагоддзя ў Гродне, як і ў Еўропе, пачынае актыўна развівацца харэаграфічнае мастацтва, — распавядае метадыст Цэнтра спадчыны Людміла Лебедзь. — Танец становіцца адной з галоўных забаваў шляхты, уключаючы каралёў. Былі балі, на якіх не толькі танчылі, але і абмяркоўвалі важныя палітычныя, ваенныя, эканамічныя, гаспадарчыя пытанні. Пачынаючы з XIX стагоддзя, балі праходзілі ў Гродне не радзей, чым раз у тыдзень у Новым замку — палацы Храптовічаў, а таксама ў сядзібах ў Красках, Падаросцы, Залессі, Свяцку. Маштабныя танцавальныя вечары арганізоўваліся ў Слоніме ва ўладаньнях Міхаіла Клеафаса Агінскага: створаны ім канал служыў натуральнай дэкарацыяй для тэатралізаваных паказаў, водных феерый і конных баталій.
Балам была характэрная выразна вытрыманая праграма, стрыжань якой — танцы. Традыцыйна баль адкрываў паланез або менуэт, следам ішоў вальс. Кульмінацыяй вечара станавілася мазурка, а завяршаў - катыльён. Наведвальнікаў выставы пазнаёмяць з іншымі падрабязнасцямі бальнага этыкету, пакажуць, у чым на вечарах фарсілі дамы і кавалеры. Арганізатары абяцаюць прайграць інтэр'ер будуара дваранкі: у такія вечары гэты дамскі пакой таксама быў адкрыты для гасцей.
І калі касцюмы таго перыяду для выставы спецыяльна адшывалі гродзенскія майстры, то ў напаўненні экспазіцыі, прысвечанай народным танцам, удзельнічалі буйныя танцавальныя калектывы вобласці.
— Калекцыю папоўнілі касцюмы, сукенкі, асабістыя рэчы артыстаў, альбомы з фотаздымкамі, прадастаўленыя народнымі ансамблямі песні і танца «Лідчанка» і імя М.-К. Агінскага, заслужанымі аматарскімі калектывамі Рэспублікі Беларусь, ансамблямі танца «Лялечкі» і «Ніва». Багата расшытыя тканыя народныя касцюмы падарыў ансамбль танца, музыкі і песні «Белыя росы». Дарэчы, наведвальнікі змогуць убачыць і карту маршруту гастроляў ансамбля, а гэта сотні гарадоў па ўсім свеце, — распавядае Людміла Лебедзь.
Месца ў экспазіцыі зоймуць стэнды, прысвечаныя народнаму ансамблю песні і танца «Нёман», Гродзенскаму дзяржаўнаму каледжу мастацтваў, якія рыхтуюць кадры для прафесійных танцавальных калектываў краіны. Тут жа можна будзе паглядзець падборку літаратуры па гісторыі танца, убачыць, якія сувеніры на танцавальную тэматыку вырабляюць гродзенскія майстры.
Усяго ў экспазіцыі будзе сабрана каля дваццаці камплектаў касцюмаў розных эпох. Пазнаёміцца з іх разнастайнасцю і даведацца падрабязнасці танцавальнага мінулага Гродзеншчыны можна будзе, пачынаючы з 16 снежня.
