Ад раніцы 4 снежня з вуліц Гродна паступаюць паведамленні ад аўтамабільных аварыях. Невялікі мароз і начны снегапад спрычыніліся да таго, што дарогі ў горадзе вельмі слізкія. Справіцца з кіраваннем пры тармажэннях і паваротах у такой сітуацыі бывае вельмі складана.
Па інфармацыі Autogrodno.by найбольш крытычная сітуацыя на праспекце Лебедзева, Індурскай шашы, Таўлая, Савецкіх памежнікаў, Магістральнай і Дубко.
Дзяжурны майстар САГ Валер пракаментаваў Hrodna.life, што ад 9.00 на дарогах горада працуе 12 машын, што раскідваюць песка-саляную сумесь. Пры неабходнасці колькасць тэхнікі на вуліцах будзе павялічана.
У пачатку лістапада «Гродзенская праўда» пісала, што каб зімой у транспарту і пешаходаў на іх не было праблем, нарыхтавана 7,2 тысячы тон пясчана-саляной сумесі, 743 тоны рэагента і амаль пяць тысяч тон пяску.
— На лінейцы гатоўнасці сёння 21 пескараскідальнікі і два рэагентараскідальнікі, пяць снегапагрузчыкаў «Амкадор», ротарны снегаачышчальнік на базе трактара МТЗ-82 і 26 плужнаадвальныя снегаачышчальнікі, восем раскідвальнікаў. Пры багатых снегападах і моцным галалёдзе будзем працаваць брыгадным метадам з прыцягненнем аўтамашын ДАІ, — распавёў намеснік дырэктара ГТУПП «Спецавтохозяйство» Франц Пачобут.
