Чытачка Hrodna.life даслала ў рэдакцыю фота: на дзвярах кіёску «Гроднааблсаюздрука» на вуліцы Паповіча, каля крамы «Каскад», павесілі новую таблічку — «Уваход з дзіцячымі вазкамі забаронены».

Прадавачка патлумачыла дзяўчыне, што гэта зроблена, бо «мамачкі крадуць». Маўляў, калі ў шапіку шмат людзей, то ў вазок лёгка схаваць нейкі тавар і вынесці яго.

У «Гроднааблсаюздруку» карэспандэнту Hrodna.life патлумачылі, што з вазкамі ў шапікі заходзіць можна — забароны няма. Проста на прадпрыемстве клапоцяцца пра дзверы — маці з вазкамі часта іх псуюць, а рамонт каштуе. Закон не забараняе заходзіць у шапік з вазком, галоўнае — рабіць гэта акуратна, патлумачыла Таццяна Міхайлаўна, адказная ў прадпрыемстве за раздробны гандаль.