У Гродне з’явілася прыватнае дэтэктыўнае агенцтва: чым яно займаецца?

З пачатку восенi ў Гродне пачало працу першае прыватне дэтэктыўнае агенцтва. За месяц дзейнасці яго паслугамі ўжо паспелі скарыстацца некаторыя гараджане. Чым займаюцца гродзенскія прыватныя дэтэктывы, даведваўся Hrodna.life.

Да нядаўняга часу ў Гродзенскай вобласці прыватныя дэтэктывы былі толькі ў Лідзе. Цяпер ёсць і ў Гродне. Прыватныя дэтэктывы гэта звычайна юрысты або былыя прадстаўнікі дзяржаўных органаў, якія добра знаёмыя з заканадаўствам. Гэта тыя, хто за кароткі час умеюць знайсці патрэбную і, галоўнае, праўдзівую інфармацыю.

Галоўнае — поўная ананімнасць

Асаблівасцю працы любога прыватнага дэтэктыва і дэтэктыўных агенцтваў з’яўляецца поўная ананімнасць. Cпецыялісты па просьбах кліентаў вызначаюць месцазнаходжанне чалавека, правяраюць дакладнасць звестак, збіраюць поўную інфармацыю пра асобы або арганізацыі. У паслугі прыватных дэтэктываў уваходзіць таксама сачэнне, выяўленне шлюбных здрад і многае іншае.

«Асноўная маса людзей звяртаецца да нас з пытаннямі менавіта шлюбнай нявернасці. А таксама бацькі дзяўчат, якія непакояцца за здароўе дачок і падазраюць мужоў альбо ў гвалце, альбо ў здрадзе, — распавядае Рустам, прадстаўнік прыватнага дэтэктыўнага агенцтва ў Гродне. — Многія нагледзяцца праграмы „Шлюбнае чытво“ і прыходзяць да нас з просьбай знайсці і прадаставіць фатаграфіі, відэа здрады або яшчэ чаго-небудзь. Усе як адзін хочуць бачыць факты. Мы тлумачым, што гэты від дзейнасці ў Беларусі дазволены толькі супрацоўнікам органаў унутраных спраў. Мы можам усё рабіць толькі візуальна: выяўляць дынаміку наведваемых месцаў, канспектаваць, размаўляць з людзьмі і г. д.»

Прафесія — новая, пытанняў - шмат

У Беларусі для працы прыватным дэтэктывам не трэба спецыяльнага сертыфіката або ліцэнзіі. Гэты від дзейнасці ў рэспубліканскім класіфікатары з’явіўся нядаўна і таму ў працы прыватных дэтэктываў узнікае яшчэ мноства пытанняў. Напрыклад, расiйскія прыватныя дэтэктыўныя агенцтвы атрымліваюць ліцэнзію ў МУС і ім нашмат прасцей працаваць з кліентамі, чым беларускім калегам.

«Дэтэктыўныя агенцтвы запатрабаваныя ў Беларусі. Акрамя выяўлення шлюбнай здрады карыстаецца попытам пошук даўжнікоў: людзей і арганізацый. Быў нядаўна ў нас чалавек, які папрасіў скласці яму генеалагічнае дрэва. Звярталіся нават людзі з пытаннямі, як пенсіянерам, якія падчас ВАВ былі вывезены ў Германію, сабраць дакументы, а таксама атрымаць дапамогу з-за мяжы. Вельмі розныя пытанні і просьбы», — дадаў Рустам.

Звярталіся да гродзенскіх дэтэктываў нават кліенты з іншых краін. Напрыклад, адна жанчына хацела праверыць, чым займаецца яе муж у камандзіроўцы ў Гродне.

Кошт на паслугі прыватных дэтэктываў фарміруецца ў залежнасці ад выдаткаванага часу і складанасці праблемы. Кантакты можна знайсці ў інтэрнэце.