АDNАK! абвяшчае аб пераносе тэрмінаў правядзення Фестывалю

У гэтым годзе Фестываль АDNАK! займеў шмат істотных зменаў, выкліканых уключэннем у рэйтынг крэатыўнасці беларускіх рэкламных агенцтваў АКМА і АРА. І каб адпавядаць яшчэ вышэй паднятай планцы, Аргкамітэт вырашыў парушыць шматгадовую традыцыю абвяшчэння Фестывалю ўвесну і перанесці тэрміны правядзення Фестывалю ADNAK!

Больш дакладныя даты правядзення Фестывалю будуць вызначаныя ў ліпені гэтага года.

«Уключэнне аж у два рэйтынгі крэатыўнасці, чаго мы чакалі даўно, матывуе нас рыхтаваць Фестываль іначай, чым у папярэднія гады. А гэта запатрабавала дадатковага часу і высілкаў. І таму, узважыўшы ўсе арганізацыйныя акалічнасці, мы вырашылі, што лепш парушыць шматгадовую традыцыю абвяшчэння Фестывалю ўвесну, чым зрабіць яго не так, як нам бачыцца ў гэтым годзе», — адзначыла сустаршыня Аргкамітэта Фестывалю, каардынатар грамадскай культурніцкай кампаніі «Будзьма беларусамі!» Ніна Шыдлоўская.

Наступны Фестываль АDNАK! пройдзе ў абноўленым фармаце.

Асноўнае — усе намінацыі Фестывалю будуць падзяляцца на 2 асобныя блокі:

1. Камерцыйны блок — камерцыйная рэклама тавараў і паслуг,
   іміджавая рэклама кампаній. Удзел у намінацыях гэтага блоку будзе платным.
2. Некамерцыйны блок — сацыяльная рэклама, грамадсказначныя і беларусаарыентаваныя праекты. Удзел у намінацыях гэтага блоку будзе па-ранейшаму бясплатным.

Таксама будзе працаваць менш складаў журы:

• Крэатыўнае журы
• Журы дызайну
• Digital-журы
• Журы сацыяльнай рэкламы, грамадсказначных і беларусаарыентаваных праектаў

Такія новаўвядзенні абумоўленыя прафесійным ростам Фестывалю, які за гады свайго існавання ператварыўся з месца акумулявання спецыялістаў рэкламнага рынку, неабыякавых да беларускай мовы і культуры, у сапраўдную творчую лабараторыю са сваімі правіламі і ўзроўнем.

Пра іншыя навінкі Фестывалю будзе паведамлена дадаткова.

Фестываль аDNаK — гэта:

— выяўленне і актывізацыя беларускага крэатыўнага коду, вылучэнне адметных рысаў беларускамоўнай рэкламы;

— фіксацыя працэсаў эвалюцыі беларускага рэкламнага рынку;

— папулярызацыя, своеасаблівая «прышчэпка беларускасці» для рэкламістаў, кліентаў і спажыўцоў.

Да ведама:

Ад самага першага Фестывалю, які прайшоў у 2010 годзе, арганізатары прапаноўвалі ўдзельнікам ідэі, дзякуючы якім прадстаўнікі грамадскасці і прафесійнай супольнасці маглі па-новаму зірнуць на актуальныя пытанні ў сферы камунікацыі і рэкламы. Кожны з Фестываляў меў сваю ўнікальную канцэпцыю, вакол якой і разгортваліся ўсе падзеі.

Прыкладам, у 2014 годзе асноўная думка, якую даносіў Фестываль, была наступнай: «Трэба так! Дбай пра сваё — не прагадаеш!». Арганізатары матывавалі беларускіх рэкламістаў працаваць у адпаведнасці з сусветным трэндам Glocal (спалучэнне глабальнага і лакальнага), калі цікавыя ідэі і рашэнні лакальнага ўзроўню могуць стаць запатрабаваныя і ў глабальным маштабе. У 2015 годзе фестываль прайшоў пад слоганам «Годны шлях рэкламіста», а ўдзельнікам прапаноўвалася праз сваю творчасць і крэатыўны падыход «дапамагчы беларускамоўнай рэкламе прайсці шлях ад нерашучай коскі да значнага і ўпэўненага клічніка!». Мінулагодні Фестываль праходзіў пад слоганам «аDNаK — Код тваёй крэатыўнасці!» і даводзіў, што сапраўдныя шэдэўры можна ствараць толькі на грунце тысячагадовых каштоўнасцяў, закладзеных у нашых генах, якія і прапаноўвалася адшукаць.

Восьмы фестываль замацоўвае папярэднія пасылы, падкрэсліваючы, што дзякуючы агульным каштоўнасцям (традыцыям, мове, генам) усе мы — аднакарэнныя.