Сімбіёз моды і гісторыі: маладая дызайнерка з Гродна стварае стыльныя строі з беларускім каларытам. Калекцыя «Слуцкія паясы» выклікала рэзананс у свеце фэшн-індустрыі – яна стала пераможцам міжнароднага фестывалю “Новыя вяршыні”, паведаміла СТВ.
Такая сукенка здольна здзівіць нават спрактыкаваных модніц. Унікальныя матывы слуцкіх паясоў арганічна ўпляліся ў сучасныя тэндэнцыі касцюма. Такі вобраз упрыгожвае сілуэт беларускі і выклікае гонар за гісторыю сваёй краіны.
Нацыянальная ідэя стала лейтматывам гэтай калекцыі. Алена Дзежыц задумала яе яшчэ студэнткай. Карпатлівая праца заняла паўгода. У выніку – 5 унікальных строяў, кожны прапрацаваны да драбнюткай дэталі. Арнаментальныя матывы выкананыя тасьмой, акрылавымі фарбамі і вышыўкай гладдзю. Колеры з беларускай сімволікі.
Алена Дзежыц, дызайнерка:
– Задача – паміж сцэнай і магчымасцю насіць у жыцці. Хтосьці можа сказаць, што цэнтральная мадэль занадта сцэнічная, вельмі кідкая. Але па апытаннях менавіта гэтая мадэль вельмі падабаецца.
Алена прызнаецца: літаральна пасля першых паказаў пасыпаліся заяўкі на касцюмы. Цэнтральны вобраз калекцыі ўжо замовіла сабе і сяброўка дызайнеркі – пачынаючая мадэль Вікторыя Ланеўская. Дзяўчына дэманстравала строй на конкурсным паказе і закахалася ў яго літаральна з першага погляду.
Вікторыя Ланеўская, мадэль:
– Нам, людзям творчым, вельмі прыемна хадзіць у чымсьці такім, зробленым сваімі рукамі і індывідуальным.
Калекцыя Алены ў корані пераасэнсаваная, у ёй няма дакладнага капіявання. Ва ўзорах – свая, жаночая філасофія.
Вольга Пянькова, дацэнт кафедры дызайну Гродзенскага дзяржаўнага ўніверсітэта імя Янкі Купалы:
– Яна гэта зрабіла вельмі тонка і з вялікім густам. Калекцыя цікавая менавіта разнастайнасцю. Яна сучасная, нягледзячы на этніку.
Любоў да шыцця, як жартуе Алена, у яе нашчадкавая. У родзе – цэлая дынастыя краўцоў.
Алена Дзежыц:
– У мяне прадзед шыў не толькі для сваёй вёскі, але і для іншых. Ён шыў у асноўным мужчынскія рэчы.
А вось якую спецыялізацыю абярэ яна – пакуль думае. У галаве – мільён ідэй, наперадзе – шырокая перспектыва. А на палатне – першыя сцежкі новай калекцыі, магчыма, зноў пераможнай.
