Выстава “Архітэктурная сімфонія Гродзеншчыны” адкрылася 6 красавіка ў аддзеле мастацтва Гродзенскай абласной бібліятэкі імя Карскага. У экспазіцыі прадстаўлены лепшыя працы праектых інстытутаў вобласці за апошнія пяць гадоў. Падчас адкрыцця выставы архітэктары распавялі аб сучасных тэндэнцыях у горадабудаўніцтве, рэалізаваных і запланаваных праектах.
Паводле Аляксандра Захарчука, галоўнага архітэктара інстытута “Гроднаграмадзянпраект”, такія сустрэчы і выставы выклікаюць цікавасць не толькі ў жыхароў горада. Для архітэктараў гэта таксама добрая магчымасць пабачыць чым жывуць і над чым працуюць калегі. Таксама на адкрыцці выступілі Рышард Кацынэль, галоўны інжынер “Гроднаграмадзянпраекта” і ганаровы грамадзянін Гродна, Аляксандр Штэн, лаўрэат ганаровага прыза “Дойлід Беларусі”, Алег Шымбарэцкі, галоўны архітэктар рэканструкцыі Старога замка і Барыс Шмыга з праектнай фірмы “Тэктон”.
З іх распрведаў наведвальнікі даведаліся, як рэканструяваўся стары мост, як будуюцца энергаэфектыўныя дамы, шукаюцца навуковыя падставы для рэканструкцыі гістарычных будынкаў і выбіраецца аблічча сучасных аб’ектаў.
Наведаць выставу можна да канца мая, па адрасу вул. Савецкая, 25. Уваход вольны
