Менш трох тыдняў застаецца да пачатку сезона па амерыканскім футболе ў Беларусі, у якім прымаюць удзел і гродзенскія “Варвары”. Каманда Аляксея Серабракова зараз узмоцнена рыхтуецца да будучых гульняў і будуе планы на новы сезон. Hrodna.life пабываў на адной з трэніровак “Варвараў” і даведаўся, чым яны пацешаць гродзенцаў у гэтым годзе.
Як і летась, у хлопцаў падрыхтоўка праходзіць на штучным газоне ЦСК “Нёман”. Па ранейшаму за арэнду поля футбалісты плацяць са сваёй кішэнi. Са слоў галоўнага трэнера, арэнда не такая ўжо і вялікая.
“Адна трэніроўка абыходзіцца нам у 30-35 рублёў. Трэніровак у сярэднім 10 у месяц. Адзначу, што гэта вельмі разумная цана за поле. Спадзяюся, з манежам будзе гэтак жа, бо мы таксама хочам у цёплых і добрых умовах трэніравацца”, – кажа Аляксей Серабракоў.
Арганізацыя хатняй гульні абыходзіцца футбалістам прыкладна ў $500, а вось вывезці каманду за мяжу – каля $700. Усё гэта аплачваецца з кішэняў гульцоў. Горад у мінулым годзе дапамагаў спартсменам толькі з размяшчэннем афіш. “Варвары” спадзяюцца, што гэтая традыцыя захаваецца.
“Планы ў нас на новы сезон вялікія і цалкам вырашальныя. План на КМК (Кубак Монтэ Кларка) – гэта перамога ў сваім дывізіёне і, адпаведна, паўфінал пры хатніх трыбунах. Што датычыцца прыцягнення гледачоў, то мы ў гэтым годзе плануем прыкласці больш сіл і сродкаў для рэкламы падзей у інтэрнэце. Гэтак жа вельмі хочам трапіць на радыё і расказаць гродзенцам аб нашым спорце і камандзе. Але пакуль гэтае пытанне застаецца адкрытым. Мы зробім усё, каб не даць нашым гледачам сумаваць”.
У цэлым, справы ў каманды ідуць яўна лепш, чым раней. У кагосьцi ўжо за плячыма нядрэнны гульнявы і трэніровачны вопыт – гэтыя людзі могуць падказваць пачаткоўцам, якія сёлета ідуць з актыўнасцю.
“Навічкі дакладна дапамаглі. Колькасць людзей на трэніроўках адчувальна вырасла, чаго мы ў першую чаргу і дамагаліся гэтымі наборамі. Усе праблемныя пазіцыі закрыць не ўдалося. Дзякуючы працы Узброеных Сіл гэтых праблем стала шмат” [многія гульцы адправіліся служыць у армію].
Пачынаюць сезон “Варвары” 8 красавіка ў 15:00 на штучным полі ЦСК “Нёман”. Уваход будзе вольны. Грозенцы будуць гуляць з мiнскiмi “Ласямi”. Першую палову сезона гродзенцы правядуць у Кубку Монтэ Кларка. КМК – гэта міжнародны турнір з 10 камандамі удзельнікамі з 5 розных краін. У рэгулярным сезоне згуляюць 4 гульні (2 дома, 2 выезды). Дома “Варвары” прымуць “Ласёў” (Мінск) і “Паганцаў” (Мінск). Выезды будуць у Кіеў да “Рэбелс” і ў Брэст да “Вартавых”. Пасля будзе плэй-оф. Восенню ў каманды запланаваны ўдзел у Кубку РБ.
