Від з акна на 24 смеццевых кантэйнеры: топ самых няўдалых месцаў для сметнікаў у Гродне

У пары крокаў ад вокнаў і балконаў, побач з дзіцячымі арэлямі і пясочніцай, на дэфіцытным месцы паркоўкі ў тупіковых дварах — гэта няпоўны спіс няўдалага размяшчэння кантэйнерных пляцовак у гродзенскіх дварах, піша Гродзенскі Зялёны партал. Журналісты прайшліся па мікрараёнах горада і склалі топ-8 двароў, дзе краявіды за акном ужо не будуць такімі, як раней.

Кантэйнерныя пляцоўкі ў дварах — новы «артэфакт» гарадской рэальнасці. За пару тыдняў жыхары амаль прызвычаіліся да думкі аб заварванні смеццеправодаў і штодзённай прабежцы да бліжэйшых кантэйнераў. Паступова забываюцца і «смеццевыя войны» жыхароў па адстойванні дзіцячых пляцовак і звыклых двароў. Дзе-нідзе да жыхароў прыслухаліся, дзе-нідзе — зрабілі так, як прасцей.

1. Двор на Ліможа, 50

Двор на Ліможа, 50 — той выпадак, калі камунальнікі пайшлі па шляху найменшага супраціўлення. Тут усталявалі адразу 16 кантэйнераў на адным участку ўсяго некалькі крокаў ад вокнаў і гаўбцоў жылога дома.

Калі раней жыхары яшчэ маглі любавацца заходам сонца з балконаў, то зараз шчыльна завешваюць вокны і імкнуцца не глядзець на знявечаны пейзаж. Нават незважаючы на ​​рэгулярны вываз смецця, карціна з дня ў дзень паўтараецца: тырчаць з кантэйнераў рознакаляровыя мяшкі з адходамі, старыя дошкі і рыззё, груды пластыкавых бутэлек, крычаць па раніцах каты. Варта ветру трохі ўзмацніцца (што пры цяперашнім надвор'і не рэдкасць), як пластыкавыя бутэлькі, паліэтыленавыя пакеты і абгорткі разлятаюцца па ўсім двары.

Жыхары дома 50 аказаліся закладнікамі сітуацыі. Пляцоўка каля іх дома абслугоўвае адразу некалькі дамоў: вуліцы Ліможа — 48, 48а, а таксама вуліцы Белыя росы — 13, 15, 19, 21. Дарэчы, частка вокнаў дома 21 на вуліцы Белыя росы таксама выходзяць на пляцоўку.

Ці варта было аб’ядноўваць аддаленыя дамы на такім невялікім участку, незразумела. Для жыхароў вуліцы Белыя росы пляцоўкі можна было абсталяваць з боку дарогі. Такім чынам, хоць бы зменшылася колькасць кантэйнераў побач з домам 50 на Ліможа. Жыхары адзначаюць: калі б кантэйнеры былі ўвесь час зачынены, такога смуроду і гнятлівай карціны каля дома не было б.

2. Двор на Ліможа, 9, 13, 13/1 (побач з СШ № 32)

Тут адразу кінуліся ў вочы, што побач з кантэйнерамі сноўдаюцца бяз справы хлапчукі. Паўнавартаснай дзіцячай пляцоўкі ў адзіным двары некалькіх дамоў няма. Жыхары распавялі, што год таму мянялі цеплатрасу, двор страціў ранейшае аблічча. А праз год тут абсталявалі кантэйнерную пляцоўку.

Зараз з забавак ёсць тры лавачкі, пясочніца і арэлі-балансіры, на зямлі яшчэ прыкметныя сляды ад будаўнічых работ. Планіроўка двара — тупіковая, што тыпова для дамоў канца 80-х. Дзецям, акрамя як у гэтым месцы, няма дзе гуляць. У дадатак, вокны адразу трох дамоў выходзяць на кантэйнерныя пляцоўкі, да бліжэйшых балконаў ўсяго некалькі крокаў.

3. Двор на Ліможа, 15/1 і 17

Кантэйнерную пляцоўку абсталявалі проста ў цэнтры маленькага вузкага падворка, ахвяраваўшы часткаю паркоўкі. Ад вокнаў і балконаў дома на Ліможа, 15 — некалькі крокаў. Побач лавачкі, якія зараз пустуюць — ахвотных весці свецкія гутаркі з відам на сметнік няма.

4. Двор на Ліможа, 2, 4 і Брыкеля 16

Тыповы сумны двор са старой заіржавелай дзіцячай пляцоўкай. Цяпер у пяці метрах ад пясочніцы і горкі прысуседзілася чарговая кантэйнерныя пляцоўка. Побач ляжыць «выдраны» з цэментам турнік. Бабуля, што гуляла побач з двума ўнукамі, паскардзілася, што ўсім домам збіралі подпісы, але да жыхароў так і не прыслухаліся. Варта ёй было толькі на пару секунд адвярнуцца ад унукаў для размовы, як малыя зараз жа пабеглі даследаваць выкапаны турнік побач з кантэйнерамі. Гуляць з дзіцём побач са смеццевымі бакамі - не самы прыемны варыянт правядзення часу, але ісці ў суседні двор не заўсёды зручна.

5. Двор на Болдзіна 12а

Кантэйнерную пляцоўку абсталявалі проста на частцы паркоўкі тупіковага двара. Побач — пляцоўка для буйнагабарытнага смецця. І ўсё ў непасрэднай блізкасці ад вокнаў жылых дамоў і невялікай зоны адпачынку з лаўкамі і пясочніцай.

6. Двор на Болдзіна 8в

Прасторная паляна побач з домам № 8 В на Болдзіна — знаходка для тыповай шчыльнай забудовы на Фартах. Дзіцячая пляцоўка з зялёнымі насаджэннямі была аддушынай для жыхароў бліжэйшых дамоў. Цяпер у некалькіх метрах таксама абсталявана кантэйнерная пляцоўка. Праўда, варта адзначыць, што кантэйнеры ў момант візіту былі пустымі.

7. Двор на Соламавай, 96

Пляцоўка для смецця тут таксама на месцы дэфіцытнай паркоўкі. У пары метраў - дзіцячы садок.

8. Двор на Дзяржынскага 153 і 163

Дваццаць чатыры кантэйнеры і пляцоўка для буйнагабарытнага смецця знаходзяцца ў пары метрах ад дома № 163 на Дзяржынскага. Раней з вокнаў і балконы пяціпавярховіка былі бачны яблыні, што растуць побач, цяпер -від на «жалезныя» шэрагі кантэйнераў. Тут, як і ў сітуацыі на Ліможа, 50, сітуацыю вырашылі адным махам — паставілі разам кантэйнеры для некалькіх дамоў.