Чырвоная дарожка, моднае адзенне, палымяныя танцы. На паказе модаў у Гродне расказалі пра трэнды лета

На адкрытай пляцоўцы каля гандлёвага цэнтра Kazzarma Mall 4 ліпеня прайшло моднае шоу «Fashion boom». Дызайнеры і прадаўцы адзення прадставілі калекцыі лета-2021. Па словах арганізатараў, праз пандэмію модныя шоў доўга «стаялі на паўзе», і рашэнне зрабіць паказ на адкрытым паветры дазволіць змяніць сітуацыю. Не перашкодзіў аматарам моды нават невялікі дождж.

Для Hrodna.life дызайнеры распавялі, на што звярнуць увагу гэтым летам і калі пройдзе чарговы паказ.

Модна тое, што экалагічна

Дызайнерка Наташа Цуран расказала Hrodna.life, што для сваіх калекцый выкарыстоўвае тэхніку пэчворк: «Усе рэшткі ад вытворчасці, швейныя адходы, састарэлае адзенне максімальна перапрацоўваюцца ў новыя калекцыі».

Ад чырвонай сукенкі да чорнага гальштука

Калекцыю для дзяўчынак-падлеткаў прадставіла крама «Deti_Grodno». На чырвонай дарожцы дэманстравалі смелыя спалучэнні - ад чырвонай сукенкі да чорнага гальштука.

Модныя танцы

Паміж паказамі калекцый для гледачоў танцавалі хлопцы і дзяўчаты са студыі «Impuls». Маленькія гледачы спрабавалі паўтараць за імі рухі.

Дзяцінства модзе не перашкода

На дарожку выйшлі і самыя маленькія ўдзельнікі ў адзенні ад крамы «Deti_Grodno». У адзенні для дзяцей заўсёды ў модзе — натуральныя тканіны.

Мікі Маус і модныя мамы з моднымі дзецьмі

Наступны выхад мадэляў - у адзенні ад дызайнеркі Юліі Траскевіч. Першая яе калекцыя, «Мікі» прысвечана любімаму герою мультфільма з дзяцінства. Большая частка адзення ў гэтай калекцыі з бавоўны і трыкатажу.

Для Hrodna.life дызайнерка распавяла, што арыенцірамі ў стварэнні калекцыі былі «стыль, зручнасць і камфорт».

Другая частка паказу ад Юліі - «Family look: модныя мамы — модныя дзеці». Адзенне тут — ад вячэрніх сукенка да стылю спорт-шык. У канцы нумара на дарожку выйшла сама дызайнерка Юлія Траскевіч.

Трэнд лета — чым ярчэй, тым лепш

Юлія распавяла Hrodna.life, што зараз у модзе жакеты са штанамі палацо і топы з касцюмамі яркіх колераў. «Чым ярчэй — тым лепш, — кажа Юлія. — Колер — фуксія, насычаны зялёны, салатавы».

Наступную калекцыю дизайнерка плануе паказаць бліжэй да восені. Як мяркуецца, там будуць плашчы, бомберы, трыкатажныя кашулі. Юлія распавяла, што працуе не толькі для подыўма. Яна можа стварыць індывідуальны «family look» для любой сям'і.

Класіка з моды не выйшла

Калекцыю класічнага адзення прадставіў салон-крама «Марго». У гэтых уборах спалучаюцца рамантычны і класічны стылі. Крама працуе ў Гродна больш за 20 гадоў.

«Лайк» дзіцячай модзе

Калекцыю дзіцячай і падлеткавай моды прадставіла крама «Модныя дзеці & Bagozza». Стыль вар'іруецца ад класічнага да спартыўнага. Паказ калекцыі завяршаецца сумеснай позай з «лайкам».

Узняць настрой і пераключыцца

Многія гледачы прыходзілі на паказы сем’ямі. Адны — падтрымаць мадэляў, іншыя — танцораў. Усе дзеці і падлеткі там мясцовыя, сябры і сваякі прыйшлі на іх паглядзець.

Гродзенец Дзмітрый ужо не першы раз прыходзіць на модныя паказы — у іх удзельнічае яго васьмігадовая дачка Караліна. Яе бабулі таксама прыйшлі падтрымаць ўнучку і хацелі б, каб такія паказы ў Гродне праводзіліся часцей — бо яны ўздымаюць настрой.

Чытайце таксама:

• Тест: Разбираетесь ли вы в моде и знаете ли её историю?
• «Пани Элиза была бы счастлива». Гродненки 50+ станцевали в честь писательницы и снялись для модного каталога
• Ад белых каўнерыкаў да гламурных шпілек. Як моднічалі гродзенскія выпускнікі ад 1950-х да нашых дзён