«Перамог на пустых колах». Чорная і белая «Волгі» сышліся ў фінальным двубоі гродзенскіх аўтабаёў

Сёлетнія аўтабаі, што прайшлі пад Гродна 19 жніўня, трымалі гледачоў у напружанні да апошняй хвіліны. Вынік апошняга двубою ў катэгорыі «База» цяжка было прадказаць яшчэ за хвіліну да сканчэння. Белая «Волга» Аляксандра Салейкі са Слоніма ўпэўнена атакавала і ціснула суперніка да сцяны. Валерый Шайтанаў на чорнай «Волзе» ўпарта трымаўся, хаця доўга не мог зрушыць аўтамабіль з месца. Але «белы сцяг» над машынай так і не з’явіўся.

Белыя пачынаюць і… не перамагаюць

«Ён не бачыць, што колы прабітыя і ўсё яшчэ на нешта спадзяецца», — каментаваў вядучы. «Саша, ты яго зрабіў!» — крычалі з трыбун. А тым часам абодва монстры нерухома застылі ля саламянай сцяны. Адзін захрас коламі, у другога замоўк рухавік. Сітуацыя склалася патавая, амаль як у шахматах. Вырашыць нерухомы фінал магло толькі судзейскае ўмяшальніцтва. Пагрузчык выцягнуў машыны на цэнтр поля, гледачы чакалі працягу.

За хвіліну да перамогі

«Завесці рухавік так і не ўдалося, — распавёў Аляксандр Салейка. — Ізноў атрымаў другое месца, як летась на „Генры“. Трохі крыўдна, што машына здалася за хвіліну да перамогі. Але нічога, гэта не апошні бой».

Аляксандр Салейка, пілот Волгі - «Вольгі» са Слоніма другі раз стаў сярэбраным прызёрам Гродзенскіх аўтабаёў
Пераможца, Валерый Шайтанаў, кажа, што перамогу прынесла чыстая выпадковасць. «Нерэальна пашанцавала. У суперніка здаўся рухавік. Мая машына была на хаду, але з моцна пашкоджанай пярэдняй часткай і двума прабітымі коламі. Як выцягнулі на цэнтр поля, я змог зрушыць машыну з месца, а супернік — не. Атрымалася, што перамог на пустых колах. Пастаўлю новыя і машына будзе ездзіць далей».

Валерый Шайтанаў з Пінска, пераможца Аўтабаёў-2017, катэгорыя «База»
Свайго монстра з надпісам «Пінскburg» на борце Валерый сабраў у перапынках паміж асноўнай работай. Ён працуе аўтаслесарам на адной з пінскіх СТА. У Гродзенскіх аўтабаях ён удзельнічаў упершыню.

«База ПРО» — першы прыз застанецца ў Гродне

У гэтай катэгорыі першынства ўпэўнена атрымаў Мікалай Журовіч з Гродна. Першы раз каманда з яго «разборкі» удзельнічала ў аўтабаях летась. «Прынялі прапанову з рэкламных мэтаў, — прызнаецца Мікалай. — А потым уцягнуліся і захапіла».

Сёлета захапленне дало свой плён. Падрыхтаваць Рэно-25 да спаборніцтваў дапамагаў камандзе дасведчаны пілот Аляксандр Ульянаў. Ён параіў канструкцыю ўзмацнення кузава і кансультаваў падчас зборкі.

Аляксандр Ульянаў (злева) і пераможца Аўтабаёў-2017 у катэгорыя База-ПРО Мікалай Журовіч
«Калі я не буду дапамагаць рыхтаваць новыя машыны, то не будзе з кім змагацца. Чым больш удзельнікаў, тым цікавей і пілотам, і гледачам. Дзеля гэтага гатовы падтрымаць усіх ахвотных далучыцца да аўтабаёў. Так што не мае сэнсу нешта ўтойваць».

Тое, што сёлета ён сам не выйшаў у пераможцы, Аляксандра не расчаравала: «У такіх баях практычна немагчыма ўсё заранёў пралічыць. Кожны раз узнікаюць новыя нюансы — ніхто не ведае што, як і калі можа зламацца».

З чаго складаецца перамога

На думку Мікалая, асноўным складнікам перамогі стала зладжаная праца ўсёй каманды. «Паломка, якую машына атрымала ў першым баі, магла б стаць апошняй для многіх. Кола вырвала разам з цапфай. Але нашы механікі справіліся з праблемай літаральна хвілін за сем».

Пасля бою машыну пераможцы акружылі дзеці. Сярод іх сыны Мікалая, Лёша і Ігнат. Хлопчыкі ў машынах ужо разбіраюцца. «Тата дазваляе ў машыну залазіць і націскаць ўсякае», — распавёў Лёша. «Гэта ў машыны рухавік, а гэта амартызатар, каб на купінах не падкідвала, а мякка праязджала», — прафесійна пракансультаваў хлопчык. «А гайкі на колах патрэбны, каб не адваліліся», — дапоўніў шасцігадовы Ігнат. «Я таксама хачу вадзіць машыну і ўдзельнічаць у аўтабаях, толькі пакуль што яшчэ вельмі малы», — дапоўніў Лёша.

Не дайшлі да фініша

Увагу гледачоў сёлетняга шоў прыцягвала машына пілота Дзяніса Рудзені. Сярод брутальных монстраў упрыгожаная карункамі белая «НеVesta» глядзелася незвычайна. «Гэта быў наш дэбют — атрымалі мора адрэналіну. Машына таксама добра сябе паказала — вытрымала вельмі сур’ёзныя ўдары, механікі пастараліся».

У аздабленні «нявесты» паўдзельнічалі і жанчыны. Ляльку-талісман, што ўпрыгожвала дах аўтамабіля, прынеслі Аня і Маргарыта Кутоўскія. «Я ўжо не гуляю з лялькамі, але трохі шкада было аддаваць. Мама ўгаварыла», — прызналася Маргарыта. Аргументам Ані, што ўпэўніў дачку, стала магчымасць прынесці славу камандзе і самой ляльцы.

Дзяніс Рудзеня і яго НеVesta

Леташні пераможца, Мікалай Верамеенка, сёлета таксама не дайшоў да фінала. «Машыну дараблялі да апошняй раніцы перад стартам. За пару дзен да баёў заклініла рухавік, прыйшлося перабіраць. Былі яшчэ праблемы з сістэмай ахалоджання, з падвескай. А на полі падвёў карбюратар — задыхнуўся. Але нічога, „Генерал Лі“ — машына яшчэ жывая, гэта сапраўдны баец. На наступны год мы вернемся».

Мікалай Верамеенка, пілот «Генерала Лі», леташні пераможца аўтабаёў

Больш здымкаў з аўтабаёў-2017 — у галерэі.

Падзяліцца

Апошнія запісы

З адной бярозы — да 200 літраў. Як беларусам здабыць бярозавы сок на радзіме і ў эміграцыі

Здабываць бярозавы сок вясной — беларуская традыцыя, у кожным лясніцтве яго можна купіць за капейкі.…

3 красавіка 2025

Тры Белавежскія пушчы. Як агароджы на мяжы змяняюць лес і жывёльны свет у Беларусі, Польшчы і паміж платамі

Белавежская пушча сёння раздзеленая не на дзве, а насамрэч на тры часткі: беларускую, польскую і…

31 сакавіка 2025

«Трэнд — мацоўня, здароўе». Задалі адны і тыя ж пытанні металістам з Беларусі і Польшчы

Ужо некалькі дзесяцігоддзяў метал-музыка аб'ядноўвае людзей не толькі адных музычных прыхільнасцяў, але і падобнага светапогляду.…

26 сакавіка 2025

У гродзенскім ГЦ развяліся прусакі. Куды звяртацца, калі заўважылі насякомых у кафэ ці ў сябе дома

У ГЗК Triniti гродзенцы заўважылі прусака — насякомае бегала па канапе ў зоне фуд-корту. Hrodna.life…

26 сакавіка 2025

«Магчыма, будзе і новы матэрыял». Вакаліст гурта Ulis Слава Корань расказаў, як эміграцыя не дае яму пісаць

Беларускі гурт Ulis праіснаваў больш за 20 гадоў. Яго спадчына жыве - музыканты робяць каверы,…

20 сакавіка 2025

«Мама выпісвала фальшывыя дакументы і дапамагала трапіць у Польшчу». Рэпатрыянтка — пра дзяцінства ў Гродне і эміграцыю ў 1946-м

Крысціна Мішчук (Пянткоўская) нарадзілася ў 1933 годзе ў Гродне ў сям'і мясцовай інтэлігенцыі. Каталічка. Тата…

18 сакавіка 2025