Парадкуюць бярлогі, змяняюць рацыён: гродзенскі заапарк пераходзіць на зімовы рэжым

З надыходам халоднага надвор’я ў гродзенскім заапарку сталі рыхтавацца да пераходу на зімовы рэжым. Малпаў і птушак змясцілі ў цёплае памяшканне, а мядзведзю даюць пабольш лапніка для ўладкавання бярлогі.

Большасць жывёл заапарка прыстасаваныя да зімовых умоў, таму пераносяць змену клімату нармальна. Але ёсць і тыя жывёлы, якія зусім не рады наступленню халадоў. Самых цеплалюбных — малпаў - ужо даўно адправілі ў цёплыя вальеры. Услед за імі ўзяліся і за экзатычных птушак, якіх у заапарку багата. Гэтыя птушкі будуць зімаваць ва ўладкаваных цёплых клетках.

Касалапых пераводзяць на спецыяльны рацыён, каб яны лягчэй упадалі ў спячку.

«Мядзведзі пачалі рабіць сабе бярлогі, для іх спецыяльна завезлі ў заапарк лапнік, які падкідаюць рэгулярна ў клетку. Прыблізна з пачатку кастрычніка ў гэтых жывёл ідзе парадкаванне бярлогаў ва ўнутраных памяшканнях. Яны самі сабе ўсё робяць і варта адзначыць, што ў сур’ёзную спячку яны не ўпадаюць, як жывёлы ў дзікай прыродзе. Нават падчас спячкі нашы мядзведзі не спыняюць харчавацца, адзінае, рацыён у іх змяняецца ў бок круп. Таксама ім будуць даваць замарожаную вада, то бок лёд. Калі добрае надвор’е будзе, то мядзведзі змогуць выходзіць са сваёй бярлогі і радаваць наведвальнікаў», — распавядае намеснік дырэктара заапарка Віталь Гуменны.

Выдатна пераносяць халады амурскія тыгры, сычуаньскі такiн, паўночныя алені і розныя віды капытных жывёл.

«Кошкі цэлы год знаходзяцца ў такіх вальерах, з цёплай унутранай часткай, але ацяпленне ўключаецца там толькі ў зімовым рэжыме. Варта адзначыць, што вальер кошак будзе адкрыты на працягу ўсяго халоднага перыяду і жывёлы змогуць выходзіць на вуліцу, калі захочуць. Рацыён у iх практычна не змяняецца. Што тычыцца капытных жывёл, то вось у іх ужо мяняецца рацыён. Сакавітвя ежа, як свежаскошаная трава, саступае месца сену, якое нарыхтоўвалася на працягу года», — тлумачыць Гуменны.

Пераход заапарка на зімовы рэжым звязаны яшчэ з тым, што з надыходам зімы цямнее раней. У сувязі з гэтым мяняецца і час працы заапарка. Наведаць звярынец можна будзе з 9.30 да 18.30, каса зачыняецца на гадзіну раней.