«Фантастыка, гэта ж „Нёман“». У цэнтры Гродна гараджанам далі пратэставаць даваенныя ровары

3 верасня ў Цэнтры гарадскога жыцця на Кірава, 3 адкрываецца выстава «Ровары дзядзькі Андрэя». Беларускі калекцыянер Андрэй Камоскі прадставіць сваю калекцыю двухколавага транспарту. Некаторыя ровары былі выпушчаныя ў Гродне яшчэ да пачатку Другой сусветнай вайны. Напярэдадні выставы Андрэй прывёз свае ровары 1930-х гадоў у цэнтр горада і даў іх пратэставаць гараджанам.

Выстава перш за ўсё прысвечана 90-годдзю пачатку прыватнай вытворчасці ровараў у Гродне [рэгістрацыі ў польскім гандлёвым рэестры — рэд.] завода «Нёман». Першая мадэль пад маркай NSG, як мяркуецца, расшыфроўваецца як Nochum Starowolski Grodno.

Некаторыя гродзенцы ў цэнтры горада пазнавалі легендарныя ровары. Падыходзілі да калекцыянера, цікавіліся і фатаграфавалі. А хтосьці нават прасіў пракаціцца.

Вяртанне легенды: у Гродне на выставе пакажуць ровары «Нёман»

Андрэй спадзяецца, што на выставу ў Цэнтр гарадскога жыцця прыйдуць і тыя гродзенцы, якія распавядуць яму нешта цікавае пра ровары «Нёман», тое што ён не ведае. Таксама калекцыянер плануе ў Гродне адшукаць новыя экспанаты для будучай выставы.

Пачатак выставы ў 19:00. Уваход вольны.