Чаму Гродна нельга лічыць маленькім горадам: 6 фактаў

Часта кажуць, што Гродна — маленькі горад. Так лічыць і 56% апытаных намі ў Instagram. Мы знайшлі 6 фактаў, якія даказваюць, што Гродна — не такі ўжо і малы.

Дарэчы, па стане на 1 студзеня 2018 года насельніцтва Гродна складала 370 919 чалавек. Нямала!

1. Амаль як сталіца кантынента

Гродна падобны паводле насельніцтва да сталіцы цэлага кантынента! Насельніцтва Канберы, сталіцы Аўстраліі, без гарадоў-спутнікаў, гэта ўсяго 395 790 чалавек. Толькі на 25 000 чалавек больш за насельніцтва нашага горада. Пабудаваць яшчэ адну Альшанку — і розніца наогул знікне!

2. Самы вялікі на захадзе

Гродна гэта самы вялікі горад у заходняй частцы Беларусі. Сёння ў Гродне жыве на 23 000 чалавек больш чым у Брэсце.

Націсніце на кнопку «Прайграваць» на графіку ніжэй, каб прасачыць за дынамікай росту абодвух гарадоў цягам апошніх 10 гадоў.

3. Калі б Гродна быў дзяржавай

Калі б наш горад быў дзяржавай, ён займаў бы 39 месца сярод 44 краін Еўропы, пакінуўшы за сабой Ісландыю, Андору, Манака, Ліхтэнштэйн, Сан-Марына і Ватыкан. Ці 181 месца сярод 242 краін свету. Някепска!

4. Расце хутчэй за Мінск

Гродна — гэта самы хуткарастучы горад у Беларусі цягам трох дзесяцігоддзяў.

За апошнія 30 год насельніцтва горада павялічылася на 26%. Для параўнання, несельніцтва Мінска вырасла на 19%.

З 2005 года Гродна вырас на 14%, а Мінск за аналічны перыяд на 10%. Мінск у 1988 — 1,607 млн жыхароў, Гродна ў 1989 — 272 тыс, Мінск у 2005 — 1,774 млн, Гродна ў 2005 — 317 тыс.

Калі наш горад захавае тэмпы росту, то неўзабаве стане трэцім па колькасці насельніцтва горадам Беларусі пасля Мінска і Гомеля.

5. Самы вялікі на 1000 км

Гродна — самы вялікі горад с поўначы на поўдзень цягам 900 км — на простым шляху ад Рыгі да Львова іншага такога ж буйнога горада няма, калі толькі не зварочваць за сотню кіламетраў у Вільню. А калі ехаць роўненька з усходу на захад, то на шляху ад Мінска да польскага Шчэціна больш за 1000 км нам не трапіцца такі ж буйны горад!

6. Большы за многія сталіцы еўрапейскіх краін

Гродна большы за сталіцы такіх дзяржаў, як Славенія — Любляна (287 тыс.), Боснія і Герцагавіна — Сараево (275 тыс.), Чарнагорыя — Падгорыца (150 тыс.). І толькі крыху меншы за сталіцу Славакіі - Братыславу (425 тыс.) ці Эстоніі - Талін (450 тыс.).